AÍWAGGĒLJŌ ÞAÍRH JŌHANNĒN

1 — — in Bēþanijin, þarei was Lazarus sa dáuþa, þanei urráisida us dáuþáim Iēsus.

2 Þaruh gawaúrhtēdun imma nahtamat jáinar, jah Marþa andbahtida; iþ Lazarus was sums þizē anakumbjandanē miþ imma.

3 Iþ Marja nam pund balsanis nardáus pistikeinis filugaláubis, jah gasalbōda fōtuns Iēsua, jah biswarb fōtuns is skufta seinamma; iþ sa gards fulls warþ dáunáis þizōs salbōnáis.

4 Qaþ þan áins þizē sipōnjē is, Judas Seimōnis sa Iskariōtēs, izei skaftida sik du galēwjan ina:

5 duƕē þata balsan ni frabaúht was in ·t· skattē jah fradáiliþ wēsi þarbam?

6 Þatuþ-þan qaþ, ni þēei ina þizē þarbanē kara wēsi, ak untē þiubs was jah arka habáida jah þata inn waúrpanō bar.

7 Qaþ þan Iēsus: lēt ija; in dag gafilhis meinis fastáida þata.

8 Iþ þans unlēdans sinteinō habáiþ miþ izwis, iþ mik ni sinteinō habáiþ.

9 Fanþ þan manageins filu Iudaiē þatei Iēsus jáinar ist, jah qēmun, ni in Iēsuis áinis, ak ei jah Lazaru sēƕeina þanei urráisida us dáuþáim.

10 Munáidēdunuþ-þan áuk þái aúhumistans gudjans, ei jah Lazaráu usqēmeina,

11 untē managái in þis garunnun Iudaiē jah galáubidēdun Iēsua.

12 Iftumin daga manageins filu sei qam at dulþái, gaháusjandans þatei qimiþ Iēsus in Iaíraúsaúlymái,

13 nēmun astans peikabagmē, jah urrunnun wiþragamōtjan imma, jah hrōpidēdun: ōsanna, þiuþida sa qimanda in namin fráujins, þiudans Israēlis.

14 Bigat þan Iēsus asilu, jah gasat ana ina, swaswē ist gamēliþ:

15 ni ōgs þus, daúhtar Siōn, sái, þiudans þeins qimiþ sitands ana fulin asiláus.

16 Þatuþ-þan ni kunþēdun sipōnjōs is frumist; ak bipē gaswēráiþs was Iēsus, þanuh gamundēdun þatei þata was du þamma gamēliþ, jah þata gatawidēdun imma.

17 Weitwōdida þan sō managei, sei was miþ imma, þan Lazaru wōpida us hláiwa jah urráisida ina us dáuþáim.

18 Duþþē iddjēdun gamōtjan imma managei, untē háusidēdun ei gatawidēdi þō táikn.

19 Þanuh þái Fareisaieis qēþun du sis missō: saíƕiþ þatei ni bōteiþ waíht; sái, sō manasēds afar imma galáiþ.

20 Wēsunuþ-þan sumái þiudō þizē urrinnandanē, ei inwiteina in þizái dulþái.

21 Þái atiddjēdun du Filippáu, þamma fram Bēþsaeida Galeilaiē, jah bēdun ina qiþandans: fráuja, wileima Iēsu gasaíƕan.

22 Gaggiþ Filippus jah qiþiþ du Andraíin, jah aftra Andraías jah Filippus qēþun du Iēsua.

23 Iþ Iēsus andhōf im qiþands: qam ƕeila ei swēráidáu sunus mans.

24 Amēn amēn qiþa izwis: nibái kaúrnō ƕáiteis gadriusandō in aírþa gaswiltiþ, silbō áinata aflifniþ: iþ jabái gaswiltiþ, manag akran baíriþ.

25 Saei frijōþ sáiwala seina, fraqisteiþ izái, jah saei fiáiþ sáiwala seina in þamma faírƕáu, in libáinái áiweinōn baírgiþ izái.

26 Jabái mis ƕas andbahtjái, mik láistjái; jah þarei im ik, þaruh sa andbahts meins wisan habáiþ; jah jabái ƕas mis andbahteiþ, swēráiþ ina atta.

27 Nu sáiwala meina gadrōbnōda, jah ƕa qiþáu? atta, nasei mik us þizái ƕeilái. Akei duppē qam in þizái ƕeilái.

28 Atta, háuhei namō þeinata! Qam þan stibna us himina: jah háuhida jah aftra háuhja.

29 Managei þan sei stōþ gaháusjandei, qēþun þeiƕōn waírþan; sumáih qēþun: aggilus du imma rōdida.

30 Andhōf Iēsus jah qaþ: ni in meina sō stibna warþ, ak in izwara.

31 Nu staua ist þizái manasēdái, nu sa reiks þis faírƕáus uswaírpada ūt.

32 Jah ik jabái usháuhjada af aírþái, alla atþinsa du mis.

33 Þatuþ-þan qaþ bandwjands ƕileikamma dáuþáu skulda gadáuþnan.

34 Andhōf imma sō managei: weis háusidēdum ana witōda þatei Xristus sijái du áiwa; jah ƕáiwa þu qiþis þatei skulds ist usháuhjan sa sunus mans? ƕas ist sa sunus mans?

35 Qaþ þan du im Iēsus: naúh leitil mēl liuhaþ in izwis ist. Gaggiþ þandē liuhaþ habáiþ, ei riqiz izwis ni gafāhái; jah saei gaggiþ in riqiza, ni wáit ƕaþ gaggiþ.

36 Þandē liuhaþ habáiþ, galáubeiþ du liuhada, ei sunjus liuhadis waírþáiþ. Þata rōdida Iēsus, jah galáiþ jah gafalh sik faúra im.

37 Swa filu imma táiknē gatáujandin in andwaírþja izē, ni galáubidēdun imma,

38 ei þata waúrd Ēsaeiins praúfētáus usfullnōdēdi þatei qaþ: fráuja, ƕas galáubida háuseinái unsarái? jah arms fráujins ƕamma andhuliþs warþ?

39 Duþþē ni mahtēdun galáubjan; untē aftra qaþ Ēsaeias:

40 gablindida izē áugōna jah gadáubida izē haírtōna, ei ni gáumidēdeina áugam jah frōþeina haírtin, jah gawandidēdeina jah ganasidēdjáu ins.

41 Þata qaþ Ēsaeias, þan saƕ wulþu is jah rōdida bi ina.

42 Þanuh þan swēþáuh jah us þáim reikam managái galáubidēdun du imma, akei faúra Fareisaium ni andhaíháitun, ei us synagōgein ni uswaúrpanái waúrþeina.

43 Frijōdēdun áuk máis háuhein manniska þáu háuhein guþs.

44 Iþ Iēsus hrōpida jah qaþ: saei galáubeiþ du mis ni galáubeiþ du mis, ak du þamma sandjandin mik.

45 Jah saei saíƕiþ mik, saíƕiþ þana sandjandan mik.

46 Ik liuhad in þamma faírƕáu qam, ei ƕazuh saei galáubjái du mis, in riqiza ni wisái.

47 Jah jabái ƕas meináim háusjái waúrdam jah galáubjái, ik ni stōja ina; nih þan qam ei stōjáu manasēd, ak ei ganasjáu manasēd.

48 Saei frakann mis jah ni andnimiþ waúrda meina, habáid þana stōjandan sik. Waúrd þatei rōdida, þata stōjiþ ina in spēdistin daga.

49 Untē ik us mis silbin ni rōdida, ak saei sandida mik atta, sah mis anabusn atgaf — —

1 Ni indrōbnái izwar haírtō; galáubeiþ du guþa jah du mis galáubeiþ.

2 In garda attins meinis saliþwōs managōs sind; aþþan niba wēseina, aíþþáu qēþjáu du izwis: gagga manwjan stad izwis.

3 Jah þan jabái gagga jah manwja izwis stad, aftra qima jah franima izwis du mis silbin, ei þarei im ik, þaruh sijuþ jah jus.

4 Jah þadei ik gagga kunnuþ, jah þana wig kunnuþ.

5 Þaruh qaþ imma Þōmas: fráuja, ni witum ƕaþ gaggis, jah ƕáiwa magum þana wig kunnan?

6 Qaþ imma Iēsus: ik im sa wigs jah sunja jah libáins. Áinshun ni qimiþ at attin, niba þaírh mik.

7 Iþ kunþēdeiþ mik, aíþþáu kunþēdeiþ jah attan meinana; jah þan fram himma kunnuþ ina jah gasaíƕiþ ina.

8 Iþ Filippus qaþuh du imma: fráuja, áugei unsis þana attan; þatuh ganah unsis.

9 Þaruh qaþ imma Iēsus: swaláud mēlis miþ izwis was, jah ni ufkunþēs mik, Filippu? saei gasaƕ mik, gasaƕ attan, jah ƕáiwa þu qiþis: áugei unsis þana attan?

10 Niu galáubeis þatei ik in attin jah atta in mis ist? Þō waúrda þōei ik rōdja izwis, af mis silbin ni rōdja, ak atta saei in mis ist, sa táujiþ þō waúrstwa.

11 Galáubeiþ mis þatei ik in attin jah atta in mis; iþ jabái ni, in þizē waúrstwē galáubeiþ mis.

12 Amēn amēn qiþa izwis: saei galáubeid mis, þō waúrstwa þōei ik táuja, jah is táujiþ jah máizōna þáim táujiþ; untē ik du attin gagga.

13 Jah þatei ƕa bidjiþ in namin meinamma, þata táuja, ei háuhjáidáu atta in sunáu.

14 Jabái ƕis bidjiþ mik in namin meinamma, ik táuja.

15 Jabái mik frijōþ, anabusnins meinōs fastáid.

16 Jah ik bidja attan, jah anþarana paraklētu gibiþ izwis, ei sijái miþ izwis du áiwa,

17 ahma sunjōs, þanei sō manaseiþs ni mag niman, untē ni saíƕiþ ina, nih kann ina; iþ jus kunnuþ ina, untē is miþ izwis wisiþ jah in izwis ist.

18 Ni lēta izwis widuwaírnans; qima at izwis.

19 Naúh leitil, jah sō manaseiþs mik ni þanaseiþs saíƕiþ; iþ jus saíƕiþ mik, þatei ik liba, jah jus libáiþ.

20 In jáinamma daga ufkunnáiþ jus þatei ik in attin meinamma jah jus in mis jah ik in izwis.

21 Saei habáid anabusnins meinōs jah fastáiþ þōs, sa ist saei frijōþ mik: jah þan saei frijōþ mik, frijōda fram attin meinamma, jah ik frijō ina jah gabaírhtja imma mik silban.

22 Þaruh qaþ imma Iudas, ni sa Iskarjōtēs: fráuja, ƕa warþ ei unsis munáis gabaírhtjan þuk silban, iþ þizái manasēdái ni?

23 Andhōf Iēsus jah qaþ du imma: jabái ƕas mik frijōþ jah waúrd mein fastáiþ, jah atta meins frijōþ ina, jah du imma galeiþōs jah saliþwōs at imma gatáujōs.

24 Iþ saei ni frijōþ mik, þō waúrda meina ni fastáiþ; jah þata waúrd þatei háuseiþ nist mein, ak þis sandjandins mik attins.

25 Þata rōdida izwis at izwis wisands.

26 Aþþan sa paraklētus, ahma sa weiha, þanei sandeiþ atta in namin meinamma, sa izwis láiseiþ allata jah gamáudeiþ izwis allis þatei qaþ du izwis.

27 Gawaírþi bileiþa izwis, gawaírþi mein giba izwis; ni swaswē sō manasēþs gibiþ, ik giba izwis. Ni indrōbnáina izwara haírtōna nih faúrhtjáina.

28 Háusidēduþ ei ik qaþ izwis: galeiþa jah qima at izwis; jabái frijōdēdeiþ mik, aíþþáu jus faginōdēdeiþ ei ik gagga du attin: untē atta meins máiza mis ist.

29 Jah nu qaþ izwis, faúrþizei waúrþi, ei biþē waírþái galáubjáiþ.

30 Þanaseiþs filu ni maþlja miþ izwis; qimiþ saei þizái manasēdái reikinōþ, jah in mis ni bigitiþ waíht.

31 Ak ei ufkunnái sō manasēþs þatei ik frijōda attan meinana, jah swaswē anabáud mis atta, swa táuja. Urreisiþ, gaggam þaþrō.

1 Ik im weinatriu þata sunjeinō, jah atta meins waúrstwja ist.

2 All táinē in mis unbaírandanē akran gōþ, usnimiþ ita: jah all akran baírandanē, gahráineiþ ita, ei managizō akran baíráina.

3 Ju jus hráinjái sijuþ in þis waúrdis þatei rōdida du izwis.

4 Wisáiþ in mis jah ik in izwis. Swē sa weinatáins ni mag akran baíran af sis silbin, niba ist ana weinatriwa, swah nih jus, niba in mis sijuþ.

5 Ik im þata weinatriu, iþ jus weinatáinōs; saei wisiþ in mis jah ik in imma, sa baíriþ akran manag, þatei inuh mik ni maguþ táujan ni waíht.

6 Niba saei wisiþ in mis, uswaírpada ūt swē weinatáins, jah gaþaúrsniþ jah galisada, jah in fōn galagjand jah inbrannjada.

7 Aþþan jabái sijuþ in mis, jah waúrda meina in izwis sind, þataƕah þei wileiþ, bidjiþ, jah waírþiþ izwis.

8 In þamma háuhiþs ist atta meins, ei akran manag baíráiþ jah waírþáiþ meinái sipōnjōs.

9 Swaswē frijōda mik atta, swah ik frijōda izwis; wisáiþ in friaþwái meinái.

10 Jabái anabusnins meinōs fastáid, sijuþ in friaþwái meinái, swaswē ik anabusnins attins meinis fastáida, jah wisa in friaþwái is.

11 Þata rōdida izwis, ei fahēþs meina in izwis sijái, jah fahēds izwara usfulljáidáu.

12 Þata ist anabusns meina, ei frijōþ izwis missō, swaswē ik frijōda izwis.

13 Máizein þizái friaþwái manna ni habáiþ, ei ƕas sáiwala seina lagjiþ faúr frijōnds seinans.

14 Jus frijōnds meinái sijuþ, jabái táujiþ þatei ik anabiuda izwis.

15 Þanaseiþs izwis ni qiþa skalkans; untē skalks ni wáit ƕa táujiþ is fráuja, iþ ik izwis qaþ frijōnds, untē all þatei háusida at attin meinamma, gakannida izwis.

16 Ni jus mik gawalidēduþ, ak ik gawalida izwis, ei jus sniwáiþ jah akran baíráiþ, jah akran izwar du áiwa sijái, ei þataƕah þei bidjáiþ attan in namin meinamma, gibiþ izwis.

17 Þata anabiuda izwis ei frijōþ izwis missō.

18 Jabái sō manasēds izwis fijái, kunneiþ ei mik fruman izwis fijáida.

19 Jabái þis faírƕáus wēseiþ, aíþþáu sō manasēds swēsans frijōdēdi; aþþan untē us þamma faírƕáu ni sijuþ, ak ik gawalida izwis us þamma faírƕáu, duþþē fijáid izwis sō manasēþs.

20 Gamuneiþ þis waúrdis þatei ik qaþ du izwis: nist skalks máiza fráujin seinamma. Jabái mik wrēkun, jah izwis wrikand; jabái mein waúrd fastáidēdeina, jah izwar fastáina.

21 Ak þata allata táujand izwis in namins meinis, untē ni kunnun þana sandjandan mik.

22 Nih qēmjáu jah rōdidēdjáu du im, frawaúrht ni habáidēdeina: iþ nu inilōns ni haband bi frawaúrht seina.

23 Saei mik fijáiþ, jah attan meinana fijáiþ.

24 Iþ þō waúrstwa ni gatawidēdjáu in im þōei anþar áinshun ni gatawida, frawaúrht ni habáidēdeina; iþ nu jah gasēƕun mik jah fijáidēdun jah mik jah attan meinana.

25 Ak ei usfullnōdēdi waúrd þata gamēlidō in witōda izē: ei fijáidēdun mik arwjō.

26 Aþþan þan qimiþ paraklētus þanei ik insandja izwis fram attin, ahman sunjōs izei fram attin urrinniþ, sa weitwōdeiþ bi mik.

27 Jah þan jus weitwōdeiþ, untē fram fruma miþ mis sijuþ.

1 Þata rōdida Iēsus uzuhhōf áugōna seina du himina jah qaþ: atta, qam ƕeila, háuhei þeinana sunu, ei sunus þeins háuhjái þuk;

2 swaswē atgaft imma waldufni alláizē leikē, ei all þatei atgaft imma, gibái im libáin áiweinōn.

3 Sōh þan ist sō áiweinō libáins, ei kunneina þuk áinana sunjana guþ jah þanei insandidēs, Iēsu Xristu.

4 Ik þuk háuhida ana aírþái; waúrstw ustáuh þatei atgaft mis du waúrkjan.

5 Jah nu háuhei mik, þu atta, at þus silbin þamma wulþáu, þanei habáida at þus, faúrþizei sa faírƕus wēsi.

6 Gabaírhtida þeinata namō mannam þanzei atgaft mis us þamma faírƕáu. Þeinái wēsun jah mis atgaft ins, jah þata waúrd þeinata gafastáidēdun.

7 Nu ufkunþa ei alla þōei atgaft mis, at þus sind;

8 untē þō waúrda þōei atgaft mis, atgaf im, jah eis nēmun bi sunjái þatei fram þus urrann, jah galáubidēdun þatei þu mik insandidēs.

9 Ik bi ins bidja; ni bi þō manasēþ bidja, ak bi þans þanzei atgaft mis, untē þeinái sind.

10 Jah meina alla þeina sind jah þeina meina, jah háuhiþs im in þáim.

11 Ni þanaseiþs im in þamma faírƕáu; iþ þái in þamma faírƕáu sind, jah ik du þus gagga. Atta weiha, fastái ins in namin þeinamma, þanzei atgaft mis, ei sijáina áin swaswē wit.

12 Þan was miþ im in þamma faírƕáu, ik fastáida ins in namin þeinamma. Þanzei atgaft mis gafastáida, jah áinshun us im ni fraqistnōda, niba sa sunus fralustáis, ei þata gamēlidō usfulliþ waúrþi.

13 Iþ nu du þus gagga, jah þata rōdja in manasēdái, ei habáina fahēd meina usfullida in sis.

14 Ik atgaf im waúrd þeinata; jah sō manasēþs fijáida ins, 286untē ni sind us ϸamma faírƕáu, swaswē ik us ϸamma faírƕáu ni im.

15 Ni bidja ei usnimáis ins us ϸamma faírƕáu, ak ei baírgáis im faúra ϸamma unsēljin.

16 Us ϸamma faírƕáu ni sind, swaswē ik us ϸamma faírƕáu ni im.

17 Weihái ins in sunjái; waúrd ϸeinata sunja ist.

18 Swaswē mik insandidēs in manasēϸ, swah ik insandida ins in ϸō manasēd.

19 Jah fram im ik weiha mik silban, ei sijáina jah eis weihái in sunjái.

20 Aϸþan ni bi ϸans bidja áinans, ak bi ϸans galáubjandans ϸaírh waúrda izē du mis,

21 ei allái áin sijáina, swaswē ϸu, atta, in mis jah ik in ϸus, ei jah ϸái in uggkis áin sijáina, ei sō manasēþs galáubjái þatei ϸu mik insandidēs.

22 Jah ik wulϸu ϸanei gaft mis, gaf im, ei sijáina áin swaswē wit áin siju.

23 Ik in im jah ϸu in mis, ei sijáina ustaúhanái du áinamma, jah kunnei sō manasēþs ϸatei ϸu mik insandidēs, jah frijōdēs ins, swaswē mik frijōdēs.

24 Atta, ϸatei atgaft mis, wiljáu ei ϸarei im ik, jah ϸái sijáina miϸ mis, ei saíƕáina wulϸu meinana ϸanei gaft mis, untē frijōdēs mik faúr gaskaft faírƕáus.

25 Atta garaíhta, jah sō manasēϸs ϸuk ni ufkunϸa; iϸ ik ϸuk kunϸa. Jah ϸái ufkunϸēdun ϸatei ϸu mik insandidēs.

26 Jah gakannida im namō ϸeinata jah kannja, ei friaϸwa þōei frijōdēs mik, in im sijái jah ik in im.