1 Anastōdeins aíwaggēljōns Iēsuis Xristáus sunáus guþs.

2 Swē gamēliþ ist in Ēsaïin praúfētáu: sái, ik insandja aggilu meinana faúra þus, saei gaman weiþ wig þeinana faúra þus.

3 Stibna wōpjandins in áuþidái: manweiþ wig fráujins, raíhtōs waúrkeiþ stáigōs gups unsaris.

4 Was Iōhannēs dáupjands in áuþdái jah mērjands dáupein idreigōs du aflageinái frawaúrhtē.

5 Jah usiddjēdun du imma all Iudaialand jah Iaírusaúlymeis, jah dáupidái wēsun allái in Iaúrdanē aƕái fram imma, andháitandans frawaúrhtim seináim.

6 Wasuþ-þan Iōhannēs gawasiþs taglam ulbandáus jah gaírda filleina bi hup seinana, jah matida þramsteins jah miliþ háiþiwisk,

7 jah mērida qiþands: qimiþ swinþōza mis sa afar mis, þizei ik ni im waírþs anahneiwands andbindan skáudaráiþ skōhē is.

8 Aþþan ik dáupja izwis in watin, iþ is dáupeiþ izwis in ahmin weihamma.

9 Jah warþ in jáináim dagam, qam Iēsus fram Nazaraíþ Galeilaias, jah dáupiþs was fram Iōhannē in Iaúrdanē.

10 Jah suns usgaggands us þamma watin gasaƕ uslukanans himinans, jah ahman swē ahak atgaggandan ana ina.

11 Jah stibna qam us himinam: þu is sunus meins sa liuba, in þuzei waíla galeikáida.

12 Jah suns sái, ahma ina ustáuh in áuþida.

13 Jah was in þizái áuþdái dagē fidwōr tiguns fráisans fram Satanin, jah was miþ diuzam, jah aggileis andbahtidēdun imma.

14 Iþ afar þatei atgibans warþ Iōhannēs, qam Iēsus in Galeilaia mērjands aíwaggēljōn þíudangardjōs guþs,

15 qiþands þatei usfullnōda þata mēl jah atnēƕida sik þiudangardi guþs: idreigop jah galáubeiþ in aíwaggēljōn.

16 Jah ƕararbōnds faúr marein Galeilaias gasaƕ Seimōnu jah Andraían brōþar is, þis Seimōnis, waírpandans nati in marein: wēsun áuk fiskjans.

17 Jah qaþ im Iēsus: hirjats afar mis, jah gatáuja igqis waírþan nutans mannē.

18 Jah suns aflētandans þō natja seina láistidēdun afar imma.

19 Jah jáinþrō inn gaggands framis leitil gasaƕ Iakōbu þana Zaíbaídaiáus jah Iōhannē brōþar is, jah þans in skipa manwjandans natja.

20 Jah suns haíháit ins. Jah aflētandans attan seinana Zaíbaídaiu in þamma skipa miþ asnjam galiþun afar imma.

21 Jah galiþun in Kafamaum, jah suns sabbatō daga galeiþands in synagōgēn láisida ins.

22 Jah usfilmans waúrþun ana þizái láiseinái is; untē was láisjands ins swē waldufni habands jah ni swaswē þái bōkarjōs.

23 Jah was in þizái synagōgēn izē manna in unhráinjamma ahmin, jah ufhrōpida

24 qiþands: fralēt, ƕa uns jah þus, Iēsu Nazōrēnái, qamt fraqistjan uns? Kann þuk, ƕas þu is, sa weiha guþs.

25 Jah andbáit ina Iēsus qiþands: þahái jah usgagg ūt us þamma, ahma unhráinja.

26 Jah tahida ina ahma sa unhráinja, jah hrōpjands stibnái mikilái usiddja us imma.

27 Jah afsláuþnōdēdun allái sildaleikjandans, swaei sōkidēdun miþ sis missō qiþhdans: ƕa sijái þata? ƕō sō láiseinō sō niujō, ei miþ waldufnja jah ahmam þáim unhráinjam anabiudiþ jah ufháusjand imma?

28 Usiddja þan meriþa is suns and allans bisitands Galeilaias.

29 Jah suns us þizái synagōgēn usgaggandans qēmun in garda Seimōnis jah Andrafins miþ Iakōbáu jah Iōhannēn.

30 Iþ swaíhrō Seimōnis lag in brinnōn: jah suns qēþun imma bi ija.

31 Jah duatgaggands urráisida þō undsrerpands handu izōs, jah aflaílōt þō sō brinnō suns, jah andbahtida im.

32 Andanahtja þan waúrþanamma, þan gasaggq sauil, bērun du imma allans þans ubil habandans jah unhulþōns habandans.

33 Jah sō baúrgs alla garunnana was at daúra.

34 Jah gaháilida managans ubil habandans missaleikáim saúhtim, jah unhulþōns managōs uswarp, jah ni fralaflot rōdjan þōs unhulþōns, untē kunþēdun ina.

35 Jah áir ūhtwōn usstandands usiddja, jah galáiþ ana áuþjana staþ, jah jáinar baþ.

36 Jah galaistans waúrþun imma Seimōn jah þái miþ imma.

37 Jah bigitandans ina qēþun du imma þatei allái þuk sōkjand.

38 Jah qaþ du im:. gaggam du þáim bisunjanē háimōm jah baúrgim, ei jah jáinar mērjáu, untē duþē qam.

39 Jah was mērjands in synagōgim izē and alla Galeilaian jah unhulþōns uswaírpands.

40 Jah qam at imma þrūtsfill habands, bidjands ina jah kniwam knussjands jah qiþands du imma þatei jabái wileis, magt mik gahráinjan.

41 Iþ Iēsus infeinands, ufrakjands handu seina attaítōk imma jah qaþ imma: wiljáu, waírþ hráins.

42 Jah biþē qaþ þata Iēsus, suns þata þrūtsfill afláiþ af imma, jah hráins warþ.

43 Jah gaƕōtjands imma suns ussandida ina,

44 jah qaþ du imma: saíƕ ei mannhun ni qiþáis waíht; ak gagg þuk silban atáugjan gudjin, jah atbaír fram gahráineinái þeindi þatei anabáuþ Mōsēs du weitwōdiþái im.

45 Iþ is usgaggands dugann mēijan filu jah usqiþan þata waúrd, swaswē is juþan mahta andáugjō in baúrg galeiþan, ak ūta ana áuþjáim stadim was; jah iddjēdun du imma allaþrō.

1 Jah galáiþ aftra in Kafamaum afar dagans, jah gafrēhun þatei in gardá ist.

2 Jah suns gaqēmun managái, swaswē juþan ni gamōstēdun nih at daúra, jah rōdoda im waúrd.

3 Jah qēmun at imma usliþan baírandans, hafanana fram fidwōrim.

4 Jah ni magandans nēƕa qiman imma faúra manageim, andhulidēdun hrōt þarei was Iēsus, jah usgrabandans insailidēdun þata badi, jah fralaflōtun ana þammei lag sa usliþa.

5 Gasaíƕands þan Iēsus galáubein izē qaþ du þamma usliþin: barnilō aflētanda þus frawaurheteis þeinōs.

6 Wēsunuh þan sumái þizē bōkarjē jáinar sitandans jah þagkjandans sis in haírtam seináim:

7 ƕa sa swa rōdeiþ náiteinins? ƕas mag aflētan frawaúrhtins, niba áins guþ

8 Jah suns ufkunnands Iēsus ahmin seinamma þatei swa þái mitōdēdun sis, qaþ du im: duƕē mitōþ þata in haírtam izwaráim?

9 ƕaþar ist azētizō du qiþan þamma usliþin: aflētanda þus frawaúrhteis þeinōs, þáu qiþan: urreis jah nim þata badi þeinata jah gagg?

10 Aþþan ei witeiþ þatei waldufni habáiþ sunus mans ana aírþái aflētan frawaúrhtins, qaþ du þamma usliþin:

11 þus qiþa: urreis nimuh þata badi þein jah gagg du garda þeinamma.

12 Jah urráis suns jah ushafiands badi usiddja faúra andwaírþja, alláizē, swaswē usgeisnōdedun allái jah háuhidēdun mikiljandans guþ, qiþandans þatei áiw swa ni gasēƕun.

13 Jah galáiþ aftra faúr marein, jah all manageins iddjēdun du imma, jah láisida ins.

14 Jah ƕarbōnds gasaƕ Laíwwi þana Alfaiáus sitandan at mōtái jah qaþ du imma: gagg afar mis. Jah usstandands iddja afar imma.

15 Jah warþ biþē is anakumbida in garda is, jah managái mōtarjōs jah frawaúrhtái miþ anakumbidēdun Iēsua jah sipōnjam is; wēsun áuk managái jah iddjēdun afar imma.

16 Jah þái bōkarjōs jah Fareisaieis gasaíƕandans ina matjandan miþ þáim mōtarjam jah frawaúrhtáim, qēþun du þáim sipōn jam is: ƕa ist þatei miþ mōtarjam jah frawaúrhtáim matjiþ jah driggkiþ

17 Jah gaháusjands Iēsus qaþ du im: ni þúrbun swinþái lēkeis, ak þái ubilaba habandans ni qam laþōn uswaúrhtans, ak frawaúrhtans.

18 Jah wēsun sipōnjōs Iōhannis jah Fareisaieis fastandans; jah atiddjēdun jah qēþun du imma: duƕē sipōnjos Iōhannēs jah Fareisaieis fastand, iþ þái þeinái sipōnjōs ni fastand?

19 Jah qaþ im Iēsus: ibái magun sunjus brūþfadis, und þatei miþ im ist brūþfaþs, fastan? swa lagga ƕeila swē miþ sis haband brūþfad, ni magun fastan.

20 Aþþan atgaggand dagōs þan afnimada af im sa brūþfaþs, jah þan fastand in jáinamma daga.

21 Ni manna plat fanins siujiþ siujiþ ana snagan faírnjana; ibái afnimái fullōn af þamma sa niuja þamma faírnjin jah waírsiza gataúra waírþiþ.

22 Ni manna giutiþ wein juggata in balgins faírnjans; ibái áuftō distaírái wein þata niujō þans balgins jah wein usgutniþ, jah þái balgeis fraqistrand; ak wein juggata in balgins niujans giutand.

23 Jah warþ þaírhgaggan imma sabbatō daga þaírh atisk, jah dugunnun sipōnjōs is skēwjandans ráupjan ahsa.

24 Jah Fareisaieis qēþun du imma: sái, ƕa táujand sipōnjos þeinái sabbatim þatei ni skuld ist?

25 Jah is qaþ du im: niu ussuggwuþ áiw ƕa gatawida Daweid, þan þaúrfta jah grēdags was, is jah þái miþ imma?

26 ƕáiwa gáláiþ in gard guþs uf Abiaþara gudjin jah hláibans faúrlageináis matida, þanzei ni skuld ist matjan niba áináim gudjam, jah gaf jah þáim miþ sis wisandam?

27 Jah qaþ im: sabbatō in mans warþ gaskapans, ni manna in sabbatō dagis;

28 swaei fráuja ist sa sunus mans jah þamma sabbatō.

1 Jah galáiþ aftra in synagōgēn, jah was jáinar manna gaþaursana habands handu.

2 Jah witáidēdun imma háilidēdiu sabbatō daga, ei wrōhidēdeina ina.

3 Jah qaþ du þamma mann þamma gaþaursana habandin handu: urreis in midumái.

4 Jah qaþ du im: skuldu ist in sabbatim þiuþ táujan aíþþáu unþiuþ táujan, sáiwala nasjan aíþþáu usqistjan? Iþ eis þaháidēdun.

5 Jah ussaíƕands ins miþ mōdj gáurs in dáubiþōs haírtin izē qaþ du þamma mann: ufrakei þō handu þeina! Jah ufrákida, jah gastōþ aftra sō handus is.

6 Jah gaggandans þan Fareisaieis sunsáiw miþ þáim Hērōdianum garūni gatawidēdun bi ina, ei imma usqēmeipa.

7 Jah Iēsus aflaiþ miþ sipōnjam seináim du marein, jah filu manageins us Galeilaia láistidēdun afar imma,

8 jah us Iudaia jah us Iaírusaúlymim jah us Idumaia jah hindana Iaúrdanáus; jah þái bi Tyra jah Sejdōna, manageins filu, gaháusjandans ƕan filu is tawida,qēmum at imma.

9 Jah qaþ þáim sipōnjam seináim ei skip habiþ wēsi at imma in þizōs manageins, ei ni þraíheina ina.

10 Managans áuk gaháilida, swaswē drusun ana ina ei imma attaítōkeina,

11 jah swa managái swē habáidēdun wundufnjōs jah ahmans unhráinjans, þáih þan ina gasēƕun, drusun du imma jah hropidēdun qiþandans þatei þu is sunus guþs.

12 Jah filu andbdit ins ei ina ni gaswikunþidēdeina.

13 Jah ustáig in faírguni jah athaíháit þanzei wilda is, jah galiþun du imma.

14 Jah gawaúrhta twalif du wisan miþ sis, jah ei insandidēdi ins mērjan,

15 jah haban waldufni du háiljan saúntis jah uswaírpan unhulþōns.

16 Jah gasatida Seimōna namō Paítrus;

17 jah Iakōbáu þamma Zaíbaídaiáus, jah Iōhannē brōþr Iakōbáus, jah gasatida im namna Baúanaírgaís, þatei ist: sunjus þeiƕōns;

18 jah Andraían jah Filippu jah Bar þaúlaúmaiu jah Matþaiu jah Þōman jah Iakōbu þana Alfaiáus, jah Þaddaiu jah Seimōna þana Kananeitēn,

19 jah Iudan Iskariōtēn, saei jah galēwida ina.

20 Jah atiddjēdun in gard, jah gaïddja sik managei, swaswē ni mahtēdun nih hláif matjan.

21 Jah háusjandans fram imma bōkarjōs jah anþarái usiddjēdun gahaban ina; qēþun áuk þatei usgáisiþs ist.

22 Jah bōkarjōs þái af Iaírusaúlymái qimandans qēþun þatei Baíaílzaíbul habáiþ, jah þatei in þamma reikistin unhulþōnō uswaírpiþ þáim unhulþōm.

23 Jah atháitands ins in gajukōm qaþ du im: ƕáiwa mag Satanas Satanan uswaírpan?

24 Jah jabái þiudangardi wiþra sik gadáiljada, ni mag standan sō þiudangardi jáina.

25 Jah jabái gards wiþra sik gadáiljada, ni mag standan sa gards jáins.

26 Jah jabái Satana usstōþ ana sik silban jah gadáiliþs warþ, ni mag gastandan, ak andi habáiþ.

27 Ni manna mag kasa swinþis galeiþands in gard is wilwan, niba faúrþis þana swinþan gabindiþ; jah þan þana gard is diswilwái.

28 Amēn, qiþa izwis, þatei allata aflētada þata frawaúrhtē sunum mannē, jah náiteinōs swa managōs swaswē wajamērjand;

29 aþþan saei wajamēreiþ ahman weihana ni habáiþ fralēt áiw, ak skula ist áiweináizōs frawaúrhtáis.

30 Untē qēþun: ahman unhráinjana habáiþ.

31 Jah qēmun þan áiþei is jah brōþrjus is jah ūta standandōna insandidēdun du imma, háitandōna ina.

32 Jah sētun bi ina managei; qēþun þan du imma: sái, áiþei þeina jah brōþrjus þeinái jah swistrjus þeinōs ūta sōkjand þuk.

33 Jah andhōf im qiþands: ƕō ist sō áiþei meina aíþþáu þái brōþrjus meinái?

34 Jah bisaíƕands bisunjanē þans bi sik sitandans qaþ: sái, áiþei meina jah þái brōþrjus meinái.

35 Saei allis waúrkeiþ wiljan guþs, sa jah brōþar meins jah swistar jah áiþei ist.

1 Jah aftra Iēsus dugann láisjan at marein, jah galēsun sik du imma managems filu, swaswē ina galeiþandan in skip gasitan in marein; jah alla sō managei wiþra marein ana staþa was.

2 Jah láisida ins in gajukōm manag, jah qaþ im in láiseinái seinái:

3 háuseiþ! Sái, urrann sa saiands du saian fráiwa seinamma.

4 Jah warþ, miþþanei saísō, sum raíhtis gadráus faúr wig, jah qēmun fuglōs jah frētun þata.

5 Anþaruþ-þan gadráus ana stáinahamma, þarei ni habáida aírþa managa, jah suns urrann, in þizei ni habáida diupáizōs aírþōs.

6 at sunnin þan urrinnandin ufbrann, jah untē ni habáida waúrtins gaþaúrsnōda.

7 Jah sum gadráus in þaúrnuns; jah ufarstigun þái þaúrnjus jah afƕapidēdun þata, jah akran ni gaf.

8 Jah sum gadráus in aírþa gōda, jah gaf akran urrinnandō jah wahsjandō, jah bar áin ·l· jah áin ·j· jah áin ·r·.

9 Jah qaþ: saei habái ausōna háusjandōna, gaháusjái.

10 Iþ biþē warþ sundrō, frēhun ina þái bi ina miþ þáim twalibim þizōs gajukōns.

11 Jah qaþ im: izwis atgiban ist kunnan rūna þiudangardjōs guþs, iþ jáináim þáim ūta in gajukōm allata waírþiþ,

12 ei síaƕandans saíƕáina jah ni gáumjáina, jah háusjandans háusjáina jah ni fraþjádina, nibái ƕan gawandjáina sik jah aflētáindáu im frawaúrhteis.

13 Jah qaþ du im: ni wituþ þō gajukōn, jah ƕáiwa allōs þōs gajukōns kunneiþ?

14 Sa saijands waúrd saijiþ.

15 Aþþan þái wiþra wig sind, þarei saiada þata waúrd, jah þan gaháusjand unkarjans, suns qimiþ Satanas jah usnimiþ waúrd þata insaianō in haírtam izē.

16 Jah sind samaleikō þái ana stáinahamma saianans, þáiei þan háusjand þata waúrd, suns miþ fahēdái nimand ita,

17 jah ni haband waúrtins in sis, ak ƕeilaƕaírbái sind; þaþrōh, biþē qimiþ aglō aíþþáu wrakja in þis waúrdis, suns gamarzjanda.

18 Jah þái sind þái in þaúrnuns saianans, þái waúrd háusjandans,

19 jah saúrgōs þizōs libáináis jah afmarzeins gabeins jah þái bi þata anþar lustjus inn atgaggandans afƕapjand þata waúrd jah akranaláus waírþiþ.

20 Jah þái sind þái ana aírþái þizái gōdōn saianans þáiei háusjand þata waúrd jah andnimand, jah akran baírand, áin ·l· jah áin ·j· jah áin ·r·.

21 Jah qaþ du im: ibái lukarn qimiþ duþē ei uf mēlan satjáidáu aíþþáu undar ligr? niu ei ana lukarnastaþan satjáidáu?

22 Nih allis ist ƕa fulginis þatei ni gabaírhtjáidáu: nih warþ analáugn, ak ei swikunþ waírþái.

23 Jabái ƕas habái áusōna háusjandōna, gaháusjái.

24 Jah qaþ du im: saíƕiþ ƕa háuseiþ! In þizáiei mitaþ mitiþ, mitada izwis jah biáukada izwis þáim galáubjandam.

25 Untē þisƕammēh saei habáiþ gibada imma; jah saei ni habáiþ jah þatei habáiþ afnimada imma.

26 Jah qaþ: swa ist þiudangardi guþs, swaswē jabái manna waírpiþ fráiwa ana aírþa.

27 Jah slēþiþ jah urreisiþ naht jah daga, jah þata fráiw keiniþ jah liudiþ swē ni wáit is.

28 Silbō áuk aírþa akran baíriþ: frumist gras, þaþrōh ahs, þaþrōh fulleiþ kaúrnis in þamma ahsa.

29 Þanuh biþē atgibada akran, suns insandeiþ gilþa, untē atist asans.

30 Jah qaþ: ƕē galeikōm þiudangardja guþs, aíþþáu in ƕileikái gajukōn gabaíram þō?

31 Swē kaúrnō sinapis, þatei þan saiada ana aírþa, minnist alláizē fráiwē ist þizē ana aírþái;

32 jah þan saiada, urrinniþ jah waírþiþ alláizē grasē máist, jah gatáujiþ astans mikilans, swaswē magun uf skadáu is fuglōs himinis gabauan.

33 Jah swaleikáim managáim gajukōm rōdida du im þata waúrd, swaswē mahtēdun háusjōn.

34 Iþ inuh gajukōn ni rōdida im, ip sundrō sipōnjam seináim andband allata.

35 Jah qaþ du im in jáinamma daga at andanahtja þan waúrþanamma; usleiþam jáinis stadis.

36 Jah aflētandans þō managein andnēmun ina swē was in skipa; jah þan anþara skipa wēsun miþ imma.

37 Jah warþ skūra windis mikila jah wēgōs waltidēdun in skip, swaswē ita juþan gafullnōda.

38 Jah was is ana nōtin ana waggarja slēpands, jah urráisidēdun ina jah qēþun du imma: láisari, niu kara þuk þizei fraqistnam?

39 Jah urreisands gasōk winda jah qaþ du marein: gaslawái, afdumbn! Jah anasiláida sa winds jah warþ wis mikil.

40 Jah qaþ du im: duƕē faúrhtái sijuþ swa? ƕáiwa ni naúh habáiþ galáubein?

41 Jah ōhtēdun sis agis mikil, jah qēþun du sis missō: ƕas þannu sa sijái, untē jah winds jah marei ufháusjand imma?

1 Jah qēmun hindar marein in landa Gaddarēnē.

2 Jah usgaggandin imma us skipa suns gamōtida imma manna us aúrahjōm in ahmin unhráinjamma,

3 saei bauáin habáida in aúrahjōm: jah ni náudibandjōm eisarneináim manna mahta ina gabindan.

4 Untē is ufta eisarnam bi fōtuns gabuganáim jah náudibandjōm eisarneináim gabundans was, jah galáusida af sis þōs náudibandjōs, jah þō ana fōtum eisarna gabrak, jah manna ni mahta ina gatamjan.

5 Jah sinteinō nahtam jah dagam in aúrahjōm jah in faírgunjam was hrōpjands jah bliggwands sik stáinam.

6 Gasaíƕands þan Iēsu faírraþrō rann jah inwáit ina,

7 jah hrōpjands stibnái mikilái qaþ: ƕa mis jah þus, Iēsu, sunáu guþs þis háuhistins? biswara þuk bi guþa, ni balwjáis mis!

8 Untē qaþ imma: usgagg, ahma unhráinja, us þamma mann!

9 Jah frah ina: ƕa namō þein? Jah qaþ du imma: namō mein Laígaíōn, untē managái sijum.

10 Jah baþ ina filu ei ni usdrēbi im us landa.

11 Wasuh þan jáinar haírda sweinē haldana at þamma faírgunja.

12 Jah bēdun ina allōs þōs unhulþōns qiþandeins: insandei unsis in þō sweina, ei in þō galeiþáima.

13 Jah usláubida im Iēsus suns. Jah usgaggandans ahmans þái unhráinjans galiþun in þō sweina, jah rann sō haírda and driusōn in marein; wēsunuþ-þan swē twōs þūsundjōs, jah afƕapnōdēdun in marein.

14 Jah þái haldandans þō sweina gaþlaúhun, jah gataíhun in baúrg jah in háimōm, jah qēmun saíƕan ƕa wēsi þata waúrþanō.

15 Jah atiddjēdun du Iēsua, jah gasaíƕand þana wōdan sitandan jah gawasidana jah fraþjandan þana saei habáida laígaíōn, jah ōhtēdun.

16 Jah spillōdēdun im þáiei gasēƕun, ƕáiwa warþ bi þana wōdan jah bi þō sweina.

17 Jah dugunnun bidjan ina galeiþan hindar markōs seinōs.

18 Jah inn gaggandan ina in skip baþ ina, saei was wōds, ei miþ imma wēsi.

19 Jah ni laílōt ina, ak qaþ du imma: gagg du garda þeinamma du þeináim, jah gateih im, ƕan filu þus fráuja gatawida jah gaarmáida þuk.

20 Jah galáiþ jah dugann mērjan in Daíkapaúlein, ƕan filu gatawida imma Iēsus; jah allái sildaleikidēdun.

21 Jah usleiþandin Iēsua in skipa aftra hindar marein, gaqēmun sik manageins filu du imma, jah was faúra marein.

22 Jah sái, qimiþ áins þizē synagōgafadē namin Jaeirus; jah saíƕands ina gadráus du fōtum Iēsuis,

23 jah baþ ina filu, qiþands þatei daúhtar meina aftumist habáiþ ei qimands lagjáis ana þō handuns, ei ganisái jah libái.

24 Jah galáiþ miþ imma, jah iddjēdun afar imma manageins filu jah þraíhun ina.

25 Jah qinōnō suma wisandei in runa blōþis jēra twalif,

26 jah manag gaþulandei fram managáim lēkjam jah fraqimandei allamma seinamma jah ni waíhtái bōtida, ak máis waírs habáida,

27 gaháusjandei bi Iēsu, atgaggandei in managein aftana attaítōk wastjái is.

28 Untē qaþ þatei jabái wastjōm is attēka, ganisa.

29 Jah sunsáiw gaþaúrsnōda sa brunna blōϸis izōs, jah ufkunϸa ana leika ϸatei gaháilnōda af ϸamma slaha.

30 Jah sunsáiw Iēsus ufkunϸa in sis silbin ϸō us sis maht usgaggandein; gawandjands sik in managein qaþ: ƕas mis taítōk wastjōm?

31 Jah qēþun du imma sipōnjōs is: saíƕis þō managein þreihandein þuk, jah qiþis: ƕas mis taítōk?

32 Jah wláitōda saíƕran þō þata táujandein.

33 Iþ sō qinō ōgandei jah reirandei, witandei þatei warþ bi ija, qam jah dráus du imma, jah qaþ imma alla þō sunja.

34 Iþ is qaþ du izái: daúhtar, galáubeins þeina ganasida þuk, gagg in gawaírþi, jah sijáis háila af þamma slaha þeinamma.

35 Naúhþanuh imma rōdjandin qēmun fram þamma synagōgafada, qiþandans þatei daúhtar þeina gaswalt: ƕa þanamáis dráibeis þana láisari?

36 Iþ Iēsus sunsáiw gaháusjands þata waúrd rōdiþ, qaþ du þamma synagōgafada: ni faúrhtei; þatáinei galáubei.

37 Jah ni fralaílōt áinōhun izē miþ sis afargaggan, nibái Paítru jah Iakōbu jah Iōhannēn brōþar Iakōbis.

38 Jah galáiþ in gard þis synagōgafadis, jah gasaƕ aúhjōdu jah grētandans jah wáifaírƕjandans filu.

39 Jah inn atgaggands qaþ du im: ƕa aúhjōþ jah grētiþ? þata barn ni gadáuþnōda, ak slēpiþ.

40 Jah bihlōhun ina. Iþ is uswaírpands alláim ganimiþ attan þis barnis jah áiþein jah þans miþ sis, jah galáiþ inn þarei was þata barn ligandō.

41 Jah faírgráip bi handáu þata barn qaþuh du izái: taleiþa kumei, þatei ist gaskeiriþ: mawilō, du þus qiþa: urreis.

42 Jah suns urráis sō mawi jah iddja; was áuk jērē twalibē; jah usgeisnōdēdun faúrhtein mikilái.

43 Jah anabáuþ im filu ei manna ni funþi þata; jah haíháit izái giban matjan.

1 Jah usstōþ jáinþrō jah qam in landa seinamma, jah láistidēdun afar imma sipōnjōs is.

2 Jah biþē warþ sabbatō, dugann in synagōgē láisjan, jah managái háusjandans sildaleikidēdun qiþandans: ƕaþrō þamma þata, jah ƕō sō handugeinō sō gibanō imma, ei mahteis swaleikōs þaírh handuns is waírþand?

3 Niu þata ist sa timrja, sa sunus Marjins, iþ brōþar Iakōba jah Iūsē jah Iudins jah Seimōnis? jah niu sind swistrjus is hēr at unsis? Jah gamarzidái waúrþun in þamma.

4 Qaþ þan im Iēsus þatei nist praúfētus unswērs, niba in gabaúrþái seinái jah in ganiþjam jah in garda seinamma.

5 Jah ni mahta jáinar áinōhun mahtē gatáujan, niba fawáim siukáim handuns galagjands gaháilida.

6 Jah sildaleikida in ungaláubeináis izē, jah bitáuh weihsa bisunjanē láisjands.

7 Jah athaíháit þans twalif jah dugann ins insandjan twans ƕanzuh, jah gaf im waldufni ahmanē unhráinjáizē.

8 Jah faúrbáuþ im ei waíht ni nēmeina in wig, niba hrugga áina, nih matibalg nih hláif nih in gaírdōs áiz,

9 ak gaskōhái suljōm: jah ni wasjáiþ twáim páidōm.

10 Jah qaþ du im: þisƕaduh þei gaggáiþ in gard, þar saljáiþ, untē usgaggáiþ jáinþrō.

11 Jah swa managái swē ni andnimáina izwis ni háusjáina izwis, usgaggandans jáinþrō ushrisjáiþ mulda þō undarō fōtum izwaráim du weitwōdiþái im. Amēn, qiþa izwis: sutizō ist Saúdaúmjam aíþþáu Gaúmaúrjam in daga stauōs þáu þizái baúrg jáinái.

12 Jah usgaggandans mēridēdun ei idreigōdēdeina.

13 Jah unhulþōns managōs usdribun, jah gasalbōdēdun alēwa managans siukans, jah gaháilidēdun.

14 Jah gaháusida þiudans Hērōdēs, swikunþ allis warþ namō 239is, jah qaþ þatei Iōhannis sa dáupjands us dáuþáim urráis, duþþē waúrkjand þōs mahteis in imma.

15 Anþarái þan qēþun þatei Hēlias ist; anþarái þan qēpun þatei praúfētēs ist swē áins þizē praúfētē.

16 Gaháusjands þan Hērōdēs qaþ þatei þammei ik háubiþ afmaímáit Iōhannē sa ist: sah urráis us dáuþáim.

17 Sa áuk raíhtis Hērōdēs insandjands gahabáida Iōhannēn jah gaband ina in karkarái in Haírōdiadins qēnáis Filippáus brōþrs seinis, untē þō galiugáida.

18 Qaþ áuk Iōhannēs du Hērōda þatei ni skuld ist þus haban qēn brōþrs þeinis.

19 Iþ sō Hērōdia náiw imma jah wilda imma usqiman, jah ni mahta:

20 untē Hērōdis ōhta sis Iōhannēn, kunnands ina waír garaíhtana jah weihana, jah witáida imma, jah háusjands imma manag gatawida, jah gabaúrjaba imma andháusida.

21 Jah waúrþans dags gatils, þan Hērōdis mēla gabaúrþáis seináizōs nahtamat waúrhta þáim máistam seináizē jah þūsundifadim jah þáim frumistam Galeilaias,

22 jah atgaggandein inn daúhtr Hērōdiadins jah plinsjandein jah galeikandein Hērōda jah þáim miþ anakumbjandam, qaþ þiudans du þizái máujái: bidei mik þisƕizuh þei wileis, jah giba þus.

23 Jah swōr izái þatei þrisƕah þei bidjáis mik, giba þus und halba þiudangardja meina.

24 Iþ si usgaggandei qaþ du áiþein seinái: ƕis bidjáu? Iþ si qaþ: háubidis Iōhannis þis dáupjandins.

25 Jah atgaggandei sunsáiw sniumundō du þamma þiudana baþ qiþandei: wiljáu ei mis gibáis ana mēsa háubiþ Iōhannis þis dáupjandins.

26 Jah gáurs waúrþans sa þiudans in þizē áiþē jah in þizē miþ anakumbjandanē ni wilda izái ufbrikan.

27 Jah suns insandjands sa þiudans spaíkulātur, anabáuþ briggan háubiþ is. Iþ is galeiþands afmaímáit imma háubiþ in karkarái,

28 jah atbar þata háubiþ is ana mēsa, jah atgaf ita þizái máujái, jah sō mawi atgaf ita áiþein seinái.

29 Jah gaháusjandans sipōnjōs is qēmun jah usnēmun leik is jah galagidēdun ita in hláiwa.

30 Jah gaïddjēdun apaústaúleis du Iēsua jah gataíhun imma allata jah swa filu swē gatawidēdun — —

53 — — jah duatsniwun.

54 Jah usgaggandam im us skipa, sunsáiw ufkunnandans ina,

55 birinnandans all þata gawi dugunnun ana badjam þans ubil habandans baíran, þadei háusidēdun ei is wēsi.

56 Jah þisƕaduh þadei iddja in háimōs aíþþáu baúrgs aíþþáu in weihsa, ana gagga lagidēdun siukans jah bēdun ina ei þáu skáuta wastjōs is attaítōkeina; jah swa managái swē attaítōkun imma, ganēsun.

1 Jah gaqēmun sik du imma Fareisaieis jah sumái þizē bōkarjē, qimandans us Iaírusaúlymim.

2 Jah gasaíƕandans sumans þizē sipōnjē is gamáinjáim handum, þat-ist unþwahanáim, matjandans hláibans;

3 iþ Fareisaieis jah allái Iudaieis, niba ufta þwahand handuns, ni matjand, habandans anafilh þizē sinistanē,

4 jah af maþla niba dáupjand ni matjand, jah anþar ist manag þatei andnēmun du haban: dáupeinins stiklē jah aúrkjē jah katilē jah ligrē;

5 þaþrōh þan frēhun ina þái Fareisaieis jah þái bōkarjōs: duƕē þái sipōnjōs þeinái ni gaggand bi þammei anafulhun þái sinistans ak unþwahanáim handum matjand hláif?

6 Iþ is andhafjands qaþ du im þatei waíla praúfētida Ēsaïas bi izwis þans liutans, swē gamēliþ ist: sō managei waírilōm mik swēráiþ, iþ haírtō izē faírra habáiþ sik mis.

7 Iþ swarē mik blōtand, láisjandans láiseinins, anabusnins mannē;

8 aflētandans raíhtis anabusn guþs habáiþ þatei anafulhun mannans, dáupeinins aúrkjē jah stiklē, jah anþar galeik swaleikata manag táujiþ.

9 Jah qaþ du im: waíla inwidiþ anabusn guþs, ei þata anafulhanō izwar fastáiþ.

10 Mōsēs áuk raíhtis qaþ: swērái attan þeinana jah áiþein þeina; jah saei ubil qiþái attin seinamma aíþþáu áiþein seinái, dáuþáu afdáuþjáidáụ.

11 Iþ jus qiþiþ: jabái qiþái manna attin seinamma aíþþáu áiþein: kaúrbān, þatei ist máiþms, þisƕah þatei us mis gabatnis

12 jah ni fralētiþ ina ni waíht táujan attin seinamma aíþþáu áiþein seinái,

13 bláuþjandans waúrd guþs þizái anabusnái izwarái, þōei anafulhuþ; jah galeik swaleikata manag táujiþ.

14 Jah atháitands alla þō managein qaþ im: háuseiþ mis allái jah fraþjáiþ.

15 Ni waíhts ist ūtaþrō mans inn gaggandō in ina þatei magi ina gamáinjan; ak þata ūt gaggandō us mann þata ist þata gamáinjandō mannan.

16 Jabái ƕas habái áusōna háusjandōna, gaháusjái.

17 Jah þan galáiþ in gard us þizái managein, frēhun ina sipōnjōs is bi þō gajukōn.

18 Jah qaþ du im: swa jah jus unwitans sijuþ? Ni fraþjiþ þammei all þata ūtaþrō inn gaggandō in mannan ni mag ina gamáinjan:

19 untē ni galeiþiþ imma in haírtō, ak in wamba, jah in urrunsa usgaggiþ, gahráineiþ allans matins.

20 Qaþuþ-þan þatei þata us mann usgaggandō þata gamáineiþ mannan.

21 Innaþrō áuk us haírtin mannē mitōneis ubilōs usgaggand: kalkinassjus, hōrinassjus, maúrþra,

22 þiubja, faíhufrikeins, unsēleins, liutei, agláitei, áugō unsēl, wajamēreins, háuhhaírtei, unwiti.

23 Þō alla ubilōna innaþrō usgaggand jah gagamáinjand mannan.

24 Jah jáinþrō usstandands galáiþ in markōs Tyrē jah Seidōnē, jah galeiþands in gard ni wilda witan mannan jah ni mahta galáugnjan.

25 Gaháusjandei raíhtis qinō bi ina, þizōzei habáida daúhtar ahman unhráinjana, qimandei dráus du fōtum is.

26 Wasuþ-þan sō qinō háiþnō, Saúrini fynikiska gabaúrþái, jah baþ ina ei þō unhulþōn uswaúrpi us daúhtr izōs.

27 Iþ Iēsus qaþ du izái; lēt faúrþis sada waírþan barna, untē ni gōþ ist niman hláib barnē jah waírpan hundam.

28 Iþ si andhōf imma jah qaþ du imma: jái fráuja; jah áuk hundōs undarō biuda matjand af draúhsnōm barnē.

29 Jah qaþ du izái: in þis waúrdis gagg, usiddja unhulþō us daúhtr þeinái.

30 Jah galeiþandei du garda seinamma bigat unhulþōn usgaggana jah þō daúhtar ligandein ana ligra.

31 Jah aftra galeiþands af markōm Tyrē jah Seidōnē qam at marein Galeilaiē miþ tweihnáim markōm Daíkapaúlaiōs.

32 Jah bērun du imma báudana stammana, jah bēdun ina ei lagidēdi imma handáu.

33 Jah afnimands ina af managein sundrō, lagida figgrans seinans in áusōna imma jah spēwands attaítōk tuggōn is,

34 jah ussaíƕands du himina gaswōgida, jah qaþ du imma: aíffaþa, þatei ist uslukn.

35 Jah sunsáiw usluknōdēdun imma hliumans jah andbundnōda bandi tuggōns is jah rōdida raíhtaba.

36 Jah anabáuþ im ei mann ni qēþeina. ƕan filu is im anabáuþ, máis þamma eis mēridēdun,

37 jah ufarassáu sildaleikidēdun qiþandans: waíla allata gatawida, jah báudans gatáujiþ gaháusjan jah unrōdjandans rōdjan.

1 In jáináim þan dagam aftra at filu managái managein wisan-dein jah ni habandam ƕa matidēdeina, atháitands sipōnjans qaþuh du im:

2 infeinōda du þizái managein, untē ju dagans þrins miþ mis wēsun, jah ni haband ƕa matjáina;

3 jah jabái fralēta ins láusqiþrans du garda izē, ufligand ana wiga; sumái raíhtis izē faírraþrō qēmun.

4 Jah andhōfun imma sipōnjōs is: ƕaþrō þans mag ƕas gasōþjan hláibam ana áuþidái?

5 Jah frah ins: ƕan managans habáiþ hláibans? Iþ eis qēþun: sibun.

6 Jah anabáuþ þizái managein anakumbjan ana aírþái; jah nimands þans sibun hláibans jah awiliudōnds gabrak jah atgaf sipōnjam seináim, ei atlagidēdeina faúr; jah atlagidēdun faúr þō managein.

7 Jah habáidēdun fiskans fawans, jah þans gaþiuþjands qaþ ei atlagidēdeina jah þans.

8 Gamatidēdun þan jah sadái waúrþun; jah usnēmun láibōs gabrukō sibun spyreidans.

9 Wēsunuþ-þan þái matjandans swē fidwōr þūsundjōs; jah fralaílōt ins.

10 Jah galáiþ sunsáiw in skip miþ sipōnjam seináim, jah qam ana fēra Magdalan.

11 Jah urrunnun Fareisaieis jah dugunnun miþ sōkjan imma sōkjandans du imma táikn us himina, fráisandans ina.

12 Jah ufswōgjands ahmin seinamma qaþ: ƕa þata kuni táikn sōkeiþ? Amēn, qiþa izwis: jabái gibáidáu kunja þamma táiknē

13 Jah aflētands ins, galeiþands aftra in skip usláiþ hindar marein.

14 Jah ufarmunnōdēdun niman hláibans jah niba áinana hláif ni habáidēdun miþ sis in skipa.

15 Jah anabáuþ im qiþands: saíƕiþ ei atsaíƕiþ izwis þis beistis Fareisaiē jah beistis Hērōdis.

16 Jah þāhtēdun miþ sis missō qiþandans: untē hláibans ni habam.

17 Jah fraþjands Iēsus qaþ du im: ƕa þaggkeiþ untē hláibans ni habáiþ? ni naúh fraþjiþ nih wituþ, untē dáubata habáiþ haírtō izwar.

18 Áugōna habandans ni gasaíƕiþ, jah áusōna habandans ni gaháuseiþ, jah ni gamunuþ.

19 Þan þuns fimf hláibans gabrak fimf þūsundjōm, ƕan managōs táinjōns fullōs gabrukō usnēmuþ? Qēþun du imma: twalit.

20 Aþþan þan þans sibun hláibans fidwōr þūsundjōm, ƕan managans spyreidans fullans gabrukō usnēmuþ? Iþ eis qēþun: sibun.

21 Jah qaþ du im: ƕáiwa ni naúh fraþjiþ?

22 Jah qēmun in Beþaniin, jah bērun du imma blindan jah bēdun ina ei imma attaítōki.

23 Jah faírgreipands handu þis blindins ustáuh ina ūtana weihsis jah speiwands in áugōna is, atlagjands ana handuns seinōs frah ina ga-u-ƕa-sēƕi?

24 Jah ussaíƕands qaþ: gasaíƕa mans, þatei swē bagmans gasaíƕa gaggandans.

25 Þaþrōh aftra galagida handuns ana þō áugōna is jah gatawida ina ussaíƕan; jah aftra gasatiþs warþ jah gasaƕ baírhtaba allans.

26 Jah insandida ina du garda is qiþands: ni in þata weihs gaggáis, ni mannhun qiþáis in þamma wēhsa.

27 Jah usiddja Iēsus jah sipōnjōs is in wēhsa Kaisarias þizōs Filippáus: jah ana wiga frah sipōnjans seinans qiþands du im: ƕana mik qiþand mans wisan?

28 Iþ eis andhōfun: Iōhannēn þana dáupjand, jah anþarái Hēlian: sumáih þan áinana praúfētē.

29 Jah is qaþ du im: aþþun jus, ƕana mik qiþiþ wisan? Andhafjands þan Paítrus qaþ du imma: þu is Xristus.

30 Jah faúrbáuþ im ei mannhun ni qēþeina bi ina.

31 Jah dugann láisjan ins þatei skal sunus mans filu winnan jah uskiusan skulds ist fram þáim sinistam jah þáim aúhumistam gudjam jah bōkarjam, jah usqiman jah afar þrins dagans usstandan.

32 Jah swikunþaba þata waúrd rōdida; jah aftiuhands ina Paítrus dugann andbeitan ina;

33 iþ is gawandjands sik jah gasaíƕands þans sipōnjans seinans andbáit Paítru qiþands: gagg hindar mik, Satana, untē ni fraþjis þáim guþs, ak þáim mannē.

34 Jah atháitands þō managein miþ sipōnjam seináim qaþ du im: saei wili afar mis láistjan, inwidái sik silban, jah nimái galgan seinana jah láistjái mik.

35 Saei allis wili sáiwala seina ganasjan, fraqisteiþ izái: iþ saei fraqisteiþ sáiwalái seinái in meina jah in þizōs aíwaggēljōns, ganasjiþ þō.

36 ƕa áuk bōteiþ mannan, jabái gageigáiþ þana faírƕu allana jah gasleiþeiþ sik sáiwalái seinái?

37 Aíþþáu ƕa gibiþ manna inmáidein sáiwalōs seináizōs?

38 Untē saei skamáiþ sik meina jah waúrdē meináizē in gabaúrþái þizái hōrinōndein jah frawaúrhtōn, jah sunus mans skamáiþ sik is, þan qimiþ in wulþáu attins seinis miþ aggilum þáim weiham.

1 Jah qaþ du im: amēn, qiþa izwis þatei sind sumái þizē hēr standandanē, þái izē ni káusjand dáuþáus, untē gasaíƕand þiudinassu guþs qumanana in mahtái.

2 Jah afar dagans saíhs ganam Iēsus Paítru jah Iakōbu jah Iōhannēn, jah ustáuh ins ana faírguni háuh sundrō áinans: jah inmáidida sik in andwaírþja izē.

3 Jah wastjōs is waúrþun glitmunjandeins, ƕeitōs swē snáiws, swaleikōs swē wullareis ana aírþái ni mag gaƕeitjan.

4 Jah atáugiþs warþ im Hēlias miþ Mōsē; jah wēsun rōdjandans miþ Iēsua.

5 Jah andhafjands Paítrus qaþ du Iēsua: rabbei, gōþ ist unsis hēr wisan, jah gawaúrkjam hlijans þrins, þus áinana jah Mōsē áinana jah áinana Hēlijin.

6 Ni áuk wissa ƕa rōdidēdi; wēsun áuk usagidái.

7 Jah warþ milhma ufarskadwjands im, jah qam stibna us þamma milhmin: sa ist sunus meins sa liuba, þamma háusjáiþ.

8 Jah anaks insaíƕandans ni þanaseiþs áinōhun gasēƕun, alja Iēsu áinana miþ sis.

9 Dalaþ þan atgaggandam im af þamma faírgunja, anabáuþ im ei mannhun ni spillōdēdeina þatei gasēƕun, niba biþē sunus mans us dáuþáim usstōþi.

10 Jah þata waúrd habáidēdun du sis missō sōkjandans: ƕa ist þata us dáuþáim usstandan?

11 Jah frēhun ina qiþandans: untē qiþand þái bōkarjōs þatei Hēlias skuli qiman faúrþis?

12 Iþ is andhafjands qaþ du im: Hēlias swēþáuh qimands faúrþis aftra gabōteiþ alla; jah ƕáiwa gamēliþ ist bi sunu mans, ei manag winnái jah frakunþs waírþái.

13 Akei qiþa izwis þatei ju Hēlias qam jah gatawidēdun imma swa filu swē wildēdun, swaswē gamēliþ ist bi ina.

14 Jah qimands at sipōnjam gasaƕ filu manageins bi ins, jah bōkarjans sōkjandans miþ im.

15 Jah sunsáiw alla managei gasaíƕandans ina usgeisnōdēdun, jah durinnandans inwitun ina.

16 Jah frah þans bōkarjans: ƕa sōkeiþ miþ þáim?

17 Jah andhafjands áins us þizái managein qaþ: láisari, brāhta sunu meinana du þus habandan ahman unrōdjandan.

18 Jah þisƕaruh þei ina gafāhiþ, gawaírpiþ ina, jah ƕaþjiþ jah kriustiþ tunþuns seinans, jah gastaúrkniþ; jah qaþ sipōnjam þeináim ei usdreibeina ina, jah ni mahtēdun.

19 Iþ is andhafjands im qaþ: ō kuni ungaláubjandō! und ƕa at izwis sijáu? und ƕa þuláu izwis? Baíriþ ina du mis.

20 Jah brāhtēdun ina at imma. Jah gasaíƕands ina sunsaíw sa ahma tahida ina; jah driusands ana aírþa walwisōda ƕaþjands.

21 Jah frah þana attan is: ƕan lagg mēl ist ei þata warþ imma? Iþ is qaþ: us barniskja.

22 Jah ufta ina jah in fōn atwarp jah in watō, ei usqistidēdi imma; akei jabái mageis, hilp unsara, gableiþjands unsis.

23 Iþ Iēsus qaþ du imma þata jabái mageis galáubjan; allata mahteig þamma galáubjandin.

24 Jah sunsáiw ufhrōpjands sa atta þis barnis miþ tagram qaþ: galáubja; hilp meináizōs ungaláubeináis!

25 Gasaíƕands þan Iēsus þatei samaþ rann managei, gaƕōtida ahmin þamma unhráinjin, qiþands du imma: þu ahma, þu unrōdjands jah báuþs, ik þus anabiuda: usgagg us þamma, jah þanaseiþs ni galeiþáis in ina.

26 Jah hrōpjands jah filu tahjands ina usiddja; jah warþ swē dáuþs, swaswē managái qēþun þatei gaswalt.

27 Iþ Iēsus undgreipands ina bi handáu urráisida ina; jah usstōþ.

28 Jah galeiþandan ina in gard, sipōnjōs is frēhun ina sundrō duƕē weis ni mahtēdum usdreiban þana?

29 Jah qaþ du im: þata kuni in waíhtái ni mag usgaggan, niba in bidái jah fastubnja.

30 Jah jáinþrō usgaggandans iddjēdun þaírh Galeilaian, jah ni wilda ei ƕas wissēdi,

31 untē láisida-sipōnjans seinans, jah qaþ du im þatei sunus mans atgibada in handuns mannē, jah usqimand imma, jah usqistiþs þridjin daga usstandiþ.

32 Iþ eis ni frōþun þamma waúrda, jah ōhtēdun ina fraíhnan.

33 Jah qam in Kafarnaum, jah in garda qumans frah ins: ƕa in wiga miþ izwis missō mitōdēduþ?

34 Iþ eis slawáidēdun; du sis missō andrunnun, ƕarjis máists wēsi.

35 Jah sitands atwōpida þans twalif jah qaþ du im: jabái ƕas wili frumists wisan, sijái alláizē aftumists jah alláim andbahts.

36 Jah nimands barn gasatida ita in midjáim im, jah ana armins nimands ita qaþ du im:

37 saei áin þizē swaleikáizē barnē andnimiþ ana namin meinamma, mik andnimiþ; jah saƕazuh saei mik andnimiþ, ni mik andnimiþ, ak þana sandjandan mik.

38 Andhōf þan imma Iōhannēs qiþands: láisari! sēƕum sumana in þeinamma namin usdreibandan unhulþōns, saei ni láisteiþ unsis, jah waridēdum imma, untē ni láisteiþ unsis.

39 Ip is qaþ: ni warjiþ imma; ni mannahun áuk ist saei táujiþ maht in namin meinamma jah magi spráutō ubilwaúrdjan mis;

40 untē saei nist wiþra izwis, faúr izwis ist.

41 Saei áuk allis gadragkjái izwis stikla watins in namin meinamma, untē Xristáus sijuþ, amēn qiþa izwis ei ni fraqisteiþ mizdōn seinái.

42 Jah saƕazuh saei gamarzjái áinana þizē leitilanē þizē galáubjandanē du mis, gōþ ist imma máis ei galagjáidáu asiluqaírnus ana balsaggan is jah frawaúrpans wēsi in marein.

43 Jah jabái marzjái þuk handus þeina, afmáit þō; gōþ þus ist hamfamma in libáin galeiþan, þáu twōs handuns habandin galeiþan in gaíaínnan, in fōn þata unƕapnandō,

44 þarei maþa izē ni gaswiltiþ jah fōn ni afƕapniþ.

45 Jah jabái fōtus þeins marzjái þuk, afmáit ina; gōþ þus ist galeiþan in libáin haltamma, þáu twans fōtuns habandin gawaírpan in gaíaínnan, in fōn þata unƕapnandō,

46 þarei maþa izē ni gaswiltiþ jah fōn ni afƕapniþ.

47 Jah jabái áugō þein marzjái þuk, uswaírp imma; gōþ þus ist háihamma galeiþan in þiudangardja guþs, þáu twa áugōna habandin atwaírpan in gaíaínnan funins,

48 þarei maþa izē ni gadáuþniþ jah fōn ni afƕapniþ.

49 ƕazuh áuk funin saltada jah ƕarjatōh hunslē salta saltada.

50 Gōþ salt; iþ jabái salt unsaltan waírþiþ, ƕē supūda? Habáiþ in izwis salt, jah gawaírþeigái sijáiþ miþ izwis missō.

1 Jah jáinþrō usstandands qam in markōm Iudaias hindar Iaúrdanáu; jah gaqēmun sik aftra manageins du imma, jah, swē bi-ūhts, aftra láisida ins.

2 Jah duatgaggandans Fareisaieis frēhun ina, skuldu sijái mann qēn afsatjan, fráisandans ina.

3 Iþ is andhafjands qaþ: ƕa izwis anabáuþ Mōsēs?

4 Iþ eis qēþun: Mōsēs usláubida unsis bōkōs afsateináis mēljan jah aflētan.

5 Jah andhafjands Iēsus qaþ du im: wiþra harduhaírtein izwara gamēlida izwis þō anabusn.

6 Iþ af anastōdeinái gaskaftáis gumein jah qinein gatawida guþ.

7 Inuh þis bileiþái manna attin seinamma jah áiþein seinái,

8 jah sijáina þō twa du leika samin, swaswē þanaseiþs ni sind twa, ak leik áin.

9 Þatei nu guþ gawaþ, manna þamma ni skáidái.

10 Jah in garda aftra sipōnjōs is bi þata samō frēhun ina.

11 Jah qaþ du im: saƕazuh saei aflētiþ qēn seina jah liugáiþ anþara, hōrinōþ du þizái.

12 Jah jabái qinō aflētiþ aban seinana jah liugada anþaramma, hōrinōþ.

13 Þanuh atbērun du imma barna, ei attaítōki im: iþ þái sipōnjōs is sōkun þáim baírandam du.

14 Gasaíƕands þan Iēsus unwērida jah qaþ du im: lētiþ þō barna gaggan du mis jah ni warjiþ þō, untē þizē ist þiudangardi guþs.

15 Amēn, qiþa izwis: saei ni andnimiþ þiudangardja guþs swē barn ni þáuh qimiþ in izái.

16 Jah gaþláihands im, lagjands handuns ana þō þiuþida im.

17 Jah usgaggandin imma in wig, duatrinnands áins jah knussjands baþ ina qiþands: láisari þiuþeiga, ƕa táujáu ei libáináis áiweinōns arbja waírþáu?

18 Iþ is qaþ du imma: ƕa mik qiþis þiuþeigana? ni ƕashun þiuþeigs, alja áins guþ.

19 Þōs anabusnins kant: ni hōrinōs; ni maúrþrjáis; ni hlifáis; ni sijáis galiugaweitwōds; ni anamahtjáis; swērái attan þeinana jah áiþein þeina.

20 Þaruh andhafjands qaþ du imma: láisari, þō alla gafastáida us jundái meināi.

21 Iþ Iēsus insaíƕands du imma frijōda ina jah qaþ du imma: áinis þus wan ist gagg, swa filu swē habáis frabugei jah gif þarbam, jah habáis huzd in himinam; jah hiri láistjan mik nimands galgan.

22 Iþ is ganipnands in þis waúrdis galáiþ gáurs; was áuk habands faíhu manag.

23 Jah bisaíƕands Iēsus qaþ sipōnjam seináim: sái, ƕáiwa agluba þái faíhō gahabandans in þiudangardja guþs galeiþand.

24 Iþ þái sipōnjōs afsláuþnōdēdun in waúrdē is. Þaruh Iēsus aftra andhafjands qaþ im: barnilōna, ƕáiwa aglu ist þáim hugjandam afar faíháu in þiudangardja guþs galeiþan.

25 Azitizō ist ulbandáu þaírh þaírkō nēþlōs galeiþan, þáu gabigamma in þiudangardja guþs galeiþan.

26 Iþ eis máis usgeisnōdēdun qiþandans du sis missō: jah ƕas mag ganisan?

27 Insaíƕands du im Iēsus qaþ: fram mannam unmahteig ist, akei ni fram guþa; allata áuk mahteig ist fram guþa.

28 Dugann þan Paítrus qiþan du imma: sái, weis aflaílōtum alla jah láistidēdum þuk.

29 Andhafjands im Iēsus qaþ: amēn, qiþa izwis: ni ƕashun ist saei aflaílōti gard aíþþáu brōþruns aíþþáu áiþein aíþþáu attan aíþþáu qēn aíþþáu barna aíþþáu háimōþlja in meina jah in þizōs aíwaggēljōns,

30 saei ni andnimái ·r· falþ nu in þamma mēla gardins jah brōþruns jah swistruns jah attan jah áiþein jah barna jah háimōþlja miþ wrakōm, jah in áiwa þamma anawaírþin libáin áiweinōn.

31 Aþþan managái waírþand frumans aftumans, jah aftumans frumans.

32 Wēsunuþ-þan ana wiga gaggandans du Iaírusaúlymái jah faúrbigaggands ins Iēsus, jah sildaleikidēdun jah afarláistjandans faúrhtái waúrþun. Jah andnimands aftra þans twalif dugann im qiþan þōei habáidēdun ina gadaban.

33 Þatei sái, usgaggam in Iaírusaúlyma jah sunus mans atgibada þáim ufargudjam jah bōkarjam, jah gawargjand ina dáuþáu, — —

34 jah biláikand ina jah bliggwand ina, jah speiwand ana ina jah usqimand imma, jah þridjin daga ustandiþ.

35 Jah athabáidēdun sik du imma Iakōbus jah Iōhannēs, sunjus Zaíbaídaiáus, qiþandans: láisari, wileima ei þatei þuk bidjōs, táujáis uggkis.

36 Iþ Iēsus qaþ im: ƕa wileits táujan mik igqis?

37 Iþ eis qēþun du imma: fragif ugkis ei áins af taíhswōn þeinái jah dins af hleidumein þeinái sitáiwa in wulþáu þeinamma.

38 Iþ Iēsus qaþuh du im: ni wituts ƕis bidjats: magutsu driggkan stikl þanei ik driggka, jah dáupeinái þizáiei ik dáupjada, ei dáupjáindáu?

39 Iþ eis qēþun du imma: magu. Iþ Iēsus qaþuh du im: swēþáuh þana stikl þanei ik driggka, driggkats, jah þizái dáupeinái þizáiei ik dáupjada dáupjanda;

40 iþ þata du sitan af taíhswōn meinái aíþþáu af hleidumein nist mein du giban, alja þáimei manwiþ was.

41 Jah gaháusjandans þái taíhun dugunnun unwērjan bi Iakōbu jah Iōhannēn.

42 Ip is atháitands ins qaþ du im: wituþ þatei páiei þuggkjand reikinōn þiudōm, gafráujinōnd im, iþ þái mikilans izē gawaldand im.

43 Iþ ni swa sijái in izwis; ak saƕazuh saei wili waírþan mikils in izwis, sijái izwar andbahts;

44 jah saei wili izwara waírþan frumists, sijái alláim skalks.

45 Jah áuk sunus mans ni qam at andbahtjam, ak andbahtjan jah giban sáiwala seina faúr managans lun.

46 Jah qēmun in Iaírikōn. Jah usgaggandin imma jáinþrō miþ sipōnjam seináim jah managein ganōhái, sunus Teimaiáus, Barteimaiáus blinda, sat faúr wig du áihtrōn.

47 Jah gaháusjands þatei Iēsus sa Nazōraius ist, dugann hrōpjan jah qiþan: sunáu Daweidis, Iēsu, armái mik!

48 Jah ƕōtidēdun imma managái ei gaþaháidēdi; iþ is filu máis hrōpida: sunáu Daweidis, armái mik!

49 Jah gastandands Iēsus haíháit atwōpjan ina. Jah wōpidēdun þana blindan, qiþandans du imma: þrafstei puk; urreis, wōpeiþ þuk.

50 Iþ is afwaírpands wastjái seinái ushláupands qam at Iēsu.

51 Jah andhafjands qaþ du imma Iēsus: ƕa wileis ei táujáu þus? Iþ sa blinda qaþ du imma: rabbaunei, ei ussaíƕáu.

52 Iþ Iēsus qaþ du imma: gagg, galáubeins þeina ganasida þuk. Jah sunsáiw ussaƕ jah láistida in wiga Iēsu.

1 Jah biþē nēƕa wēsun Iaírusalēm, in Bēþsfagein jah Biþaniin at faírgunja alēwjin, insandida twans sipōnjē seináizē,

2 jah qaþ du im: gaggats in háim þō wiþrawaírþōn iggqis, jah sunsáiw inn gaggandans in þō baúrg bigitats fulan gabundanana, ana þammei naúh áinshun mannē ni sat; andbindandans ina attiuhats.

3 Jah jabái ƕas iggqis qiþái: duƕē þata táujats? qiþáits: þatei fráuja þis gaírneiþ; jah sunsáiw ina insandeiþ hidrē.

4 Galiþun þan jah bigētun fulan gabundanana at daúra ūta ana gagga; jah andbundun ina.

5 Jah sumái þizē jáinar standandanē qēþun du im: ƕa táujats andbindandans þana fulan?

6 Iþ eis qēþun du im swaswē anabáuþ im Iēsus, jah laílōtun ins.

7 Jah brāhtēdun þana fulan at Iēsua; jah galagidēdun ana wastjōs seinōs, jah gasat ana ina.

8 Managái þan wastjōm seináim strawidēdun ana wiga; sumái astans maímáitun us bagmam jah strawidēdun ana wiga.

9 Jah þái faúragaggandans hrōpidēdun qiþandans: ōsanna, þiuþida sa qimanda in namin fráujins!

10 Þiuþidō sō qimandei þiudangardi in namin attins unsaris Daweidis, ōsanna in háuhistjam!

11 Jah galáiþ in Iaírusaúlyma Iēsus jah in alh; jah bisaíƕands alla, at andanahtja juþan wisandin ƕeilái usiddja in Bēþanian miþ þáim twalibim.

12 Jah iftumin daga usstandandam im us Bēþaniin grēdags was.

13 Jah gasaíƕands smakkabagm faírraþrō habandan láuf atiddja, ei áuftō bigēti ƕa ana imma; jah qimands at imma ni waíht bigat ana imma niba láuf; ni áuk was mēl smakkanē.

14 Jah usbaírands qaþ du imma: ni þanaseiþs us þus áiw manna akran matjái. Jah gaháusidēdun þái sipōnjōs is.

15 Jah iddjēdun du Iaírusaúlymái. Jah atgaggands Iēsus in alh dugann uswaírpan þans frabugjandans jah bugjandans in alh, jah mēsa skattjanē jah sitlans þizē frabugjandanē ahakim uswaltida.

16 Jah ni laílōt ei ƕas þaírhbēri kas þaírh þō alh.

17 Jah láisida qiþands du im: niu gamēliþ ist þatei razn mein razn bidō háitada alláim þiudōm? iþ jus gatawidēduþ ita du filigrja wáidēdjanē.

18 Jah gaháusidēdun þái bōkarjōs jah gudjanē aúhumistans jah sōkidēdun, ƕáiwa imma usqistidēdeina: ōhtēdun áuk ina, untē alla managei sildaleikidēdun in láiseináis is.

19 Jah biþē andanahti warþ, usiddja ūt us þizái baúrg.

20 Jah in maúrgin faúrgaggandans gasēƕun þana smakkabagm þaúrsjana us waúrtim.

21 Jah gamunands Paítrus qaþ du imma: rabbei, sái, smakkabagms þanei fraqast gaþaúrsnōda.

22 Jah andhafjands Iēsus qaþ du im: habáiþ galáubein guþs!

23 Amēn áuk qiþa izwis, þisƕazuh ei qiþái du þamma faírgunja: ushafei þuk jah waírp þus in marein, jah ni tuzwērjái 254in haírtin seinamma, ak galáubjái pata, ei þatei qiþiþ gagaggiþ, waírþiþ imma þisƕah þei qiþiþ.

24 Duþþē qiþa izwis: allata þisƕah þei bidjandans sōkeiþ, galáubeiþ þatei nimiþ, jah waírþiþ izwis.

25 Jah þan standáiþ bidjandans, aflētáiþ, jabái ƕa habáiþ wiþra ƕana, ei jah atta izwar sa in himinam aflētái izwis missadēdins izwarōs.

26 Iþ jabái jus ni aflētiþ, ni þáu atta izwar sa in himinam aflētiþ izwis missadēdins izwarōs.

27 Jah iddjēdun aftra du Iaírusaúlymái. Jah in alh ƕarbōndin imma, atiddjēdun du imma þái aúhumistans gudjans jah bōkarjōs jah sinistans.

28 Jah qēþun du imma: in ƕamma waldufnjē þata táujis? jah ƕas þus þata waldufni atgaf, ei þata táujis?

29 Iþ Iēsus andhafjands qaþ du im: fraíhna jah ik izwis áinis waúrdis jah andhafjiþ mis, jah qiþa izwis in ƕamma waldufnjē þata táuja.

30 Dáupeins Iōhannis uzuh himina was þáu uzuh mannam? andhafjiþ mis.

31 Jah þāhtēdun du sis missō qiþandans, jabái qiþam: us himina, qiþiþ: aþþan duƕē ni galáubidēduþ imma?

32 Ak qiþam: us mannam, ūhtēdun þō managein. Allái áuk alakjō habáidēdun Iōhannēn þatei bi sunjái praúfētēs was.

33 Jah andhafjands qēþun du Iēsua: ni witum. Jah andhafjands Iēsus qaþ du im: nih ik izwis qiþa in ƕamma waldufnjē þata táuja.

1 Jah dugann im in gajukōm qiþan: weinagard ussatida manna, jah bisatida ina faþōm, jah usgrōf dal uf mēsa, jah gatimrida kēlikn, jah anafalh ina waúrstwjam, jah afláiþ aljaþ.

2 Jah insandida du þáim waúrstwjam at mēl skalk, ei at þáim waúrstwjam nēmi akranis þis weinagardis.

3 Iþ eis nimandans ina usbluggwun jah insandidēdun láushandjan.

4 Jah aftra insandida du im anþarana skalk; jah þana stáinam waírpandans gaáiwiskōdēdun jah háubiþ wundan brāhtēdun, jah insandidēdun ganáitidana.

5 Jah aftra insandida anþarana; jah jáinana afslōhun, jah managans anþarans, sumans usbliggwandans, sumanzuh þan usqimandans.

6 Þanuh naúhþanuh áinana sunu áigands liubana sis, insandida jah þana du im spēdistana, qiþands þatei gaáistand sunu meinana.

7 Iþ jáinái þái waúrstwjans qēþun du sis missō þatei sa ist sa arbinumja; hirjiþ, usqimam imma, jah unsar waírþiþ þata arbi.

8 Jah undgreipandans ina usqēmun, jah uswaúrpun imma ūt as þamma weinagarda.

9 ƕa nuh táujái fráuja þis weinagardis? Qimiþ jah usqisteiþ þans waúrstwjans, jah gibiþ þana weinagard anþaráim.

10 Nih þata gamēlidō ussuggwuþ: stáins þammei uswaúrpun þái timrjans, sah warþ du háubida waíhstins?

11 Fram fráujin warþ sa, jah ist sildaleiks in áugam unsaráim.

12 Jah sōkidēdun ina undgreipan, jah ōhtēdun þō managein; frōþun áuk þatei du im þō gajukōn qaþ. Jah aflētandans ina galiþun.

13 Jah insandidēdun du imma sumái þizē Fareisaiē jah Hērōdianē, ei ina ganuteina waúrda.

14 Iþ eis qimandans qēþun du imma: láisari, witum þatei sunjeins is jah ni kara þuk manshun; ni áuk saíƕis in andwaírþja mannē, ak bi sunjái wig guþs láiseis: skuldu ist kaisaragild giban kaisara, þáu niu gibáima?

15 Iþ Iēsus gasaíƕands izē liutein qaþ du im: ƕa mik fráisiþ? atbaíriþ mis skatt, ei gasaíƕáu.

16 Iþ eis atbērun, jah qaþ du im: ƕis ist sa manleika jah sō ufarmēleins? Iþ eis qēþun du imma: kaisaris.

17 Jah andhafjands Iēsus qaþ du im: usgibiþ þō kaisaris kaisara jah þō guþs guþa. Jah sildaleikidēdun ana þamma.

18 Jah atiddjēdun Saddukaieis du imma þáiei qiþand usstass ni wisan, jah frēhun ina qiþandans:

19 Láisari, Mōsēs gamēlida unsis þatei jabái ƕis brōþar gadáuþnái, jah bileiþái qēnái, jah barnē ni bileiþái, ei nimái brōþar is þō qēn is, jah ussatjái barna brōþr seinamma.

20 Sibun brōþrahans wēsun; jah sa frumista nam qēn, jah gaswiltands ni biláiþ fráiwa.

21 Jah anþar nam þō; jah gadáuþnōda, jah ni sa biláiþ fráiwa. Jah þridja samaleikō.

22 Jah nēmun þō samaleikō þái sibun, jah ni biliþun fráiwa. Spēdumista alláizē gaswalt jah sō qēns.

23 In þizái usstassái, þan usstandand, ƕarjamma izē waírþiþ qēns? Þái áuk sibun áihtēdun þō du qēnái.

24 Jah andhafjands Iēsus qaþ du im: niu duþē aírzjái sijuþ, ni kunnandans mēla nih maht guþs?

25 Allis þan usstandand us dáuþáim, ni liugand ni liuganda, ak sind swē aggiljus þái in himinam.

26 Aþþan bi dáuþans, þatei urreisand, niu gakunnáidēduþ ana bōkōm Mōsēzis ana aíƕatundjái, ƕáiwa imma qaþ guþ qiþands: ik im guþ Abrahamis jah guþ Isakis jah Iakōbis?

27 Nist guþ dáuþáizē, ak qiwáizē. Aþþan jus filu aírzjái sijuþ.

28 Jah duatgaggands áins þizē bōkarjē, gaháusjands ins samana sōkjandans, gasaíƕands þatei waíla im andhōf, frah ina: ƕarja ist alláizō anabusnē frumista?

29 Iþ Iēsus andhōf imma þatei frumista alláizō anabusns: háusei Israēl, fráuja guþ unsar fráuja áins ist.

30 Jah frijōs fráujan guþ þeinana us allamma haírtin þeinamma jah us allái sáiwalái þeinái jah us allái gahugdái þeinái jah us allái mahtái þeinái. Sō frumista anabusns.

31 Jah anþara galeika þizái: frijōs nēƕundjan þeinana swē þuk silban. Máizei þáim anþara anabusns nist.

32 Jah qaþ du imma sa bōkareis: waíla, láisari, bi sunjái qast þatei áins ist, jah nist anþar alja imma;

33 jah þata du frijōn ina us allamma haírtin jah us allamma fraþja jah us allái sáiwalái jah us allái mahtái, jah þata du 257frijōn nēƕundjan swē sik silban managizō ist alláim þáim alabrunstim jah sáudim.

34 Jah Iēsus gasaíƕands ina þatei frōdaba andhōf, qaþ du imma: ni faírra is þiudangardjái guþs. Jah áinshun þanaseiþs ni gadaúrsta ina fraíhnan.

35 Jah andhafjands Iēsus qaþ láisjands in alh: ƕáiwa qiþand þái bōkarjōs þatei Xristus sunus ist Daweidis?

36 Silba áuk Daweid qaþ in ahmin weihamma: qiþiþ fráuja du fráujin meinamma, sit af taíhswōn meinái, untē ik galagja fijands þeinans fōtubaúrd fōtiwē þeináizē.

37 Silba raíhtis Daweid qiþiþ ina fráujan, jah ƕaþrō imma sunus ist? Jah alla sō managei háusidēdun imma gabaúrjaba.

38 Jah qaþ du im in láiseinái seinái: saíƕiþ faúra bōkarjam — —

16 — — wastja seina.

17 Aþþan wái þáim qiþuhaftōm jah daddjandeim in jáináim dagam.

18 Aþþan bidjáiþ ei ni waírþái sa þlaúhs izwar wintráu.

19 Waírþand áuk þái dagōs jáinái aglō swaleika, swē ni was swaleika fram anastōdeinái gaskaftáis þōei gaskōp guþ, und hita, jah ni waírþiþ.

20 Jah ni fráuja gamaúrgidēdi þans dagans, ni þáuh ganēsi áinhun leikē; akei in þizē gawalidanē þanzei gawalida, gamaúrgida þans dagans.

21 Jah þan jabái ƕas izwis qiþái: sái, hēr Xristus, aíþþáu sái, jáinar, ni galáubjáiþ;

22 untē urreisand galiugaxristjus jah ga gapraúfēteis, jah giband táiknins jah faúratanja du afaírzjan, jabái mahteig sijái, jah þans gawalidans.

23 Iþ jus saíƕiþ, sái, faúragatáih izwis allata.

24 Akei in jáinans dagans afar þō aglōn jáina sauil riqizeiþ jah mēna ni gibiþ liuhaþ sein.

25 Jah staírnōns himinis waírþand driusandeins jah mahteis þōs in himinam gawagjanda.

26 Jah þan gasaíƕand sunu mans qimandan in milhmam miþ mahtái managái jah wulþáu.

27 Jah þan insandeiþ aggiluns seinans jah galisiþ þans gawalidans seinans af fidwōr windam fram andjam aírþōs und andi himinis.

28 Aþþan af smakkabagma ganimiþ þō gajukōn. Þan þis juþan asts þlaqus waírþiþ jah uskeinand láubōs, kunnuþ þatei neƕa ist asans.

29 Swah jah jus, þan gasaíƕiþ þata waírþan, kunneiþ þatei nēƕa sijuþ at — —

4 — — fraqisteins þis balṡanis warþ?

5 Maht wēsi áuk þata balsan frabugjan in managizō þáu þrija hunda skattē, jah giban unlēdáim. Jah andstaúrráidēdun þō.

6 Iþ Iēsus qaþ: lētiþ þō; duƕē izái usþriutiþ? þannu gōþ waúrstw waúrhta bi mis.

7 Sinteinō áuk þans unlēdans habáiþ miþ izwis, jah þan wileiþ, maguþ im waíla táujan; iþ mik ni sinteinō habáiþ.

8 Þatei habáida sō gatawida; faúrsnáu salbōn mein leik du usfilha.

9 Amēn, qiþa izwis: þisƕaruh þei mērjada sō aíwaggēljō and alla manasēþ, jah þatei gatawida sō rōdjada du gamundái izōs.

10 Jah Iudas Iskariōteis, áins þizē twalibē, galáiþ du þáim gudjam, ei galēwidēdi ina im.

11 Iþ eis gaháusjandans faginōdēdun jah gahaíháitun imma faíhu giban; jah sōkida ƕáiwa gatilaba ina galēwidēdi.

12 Jah þamma frumistin daga azymē, þan þaska salidēdun, 259 qēþun du imma þái sipōnjōs is: ƕar wileis ei galeiþandans manwjáima, ei matjáis paska?

13 Jah insandida twans sipōnjē seináizē qaþuh du im: gaggats in þō baúrg, jah gamōteiþ igqis manna kas watins baírands: gaggats afar þamma,

14 jah þadei inn galeiþái, qiþáits þamma heiwafráujin þatei láisareis qiþiþ: ƕar sind saliþwōs þarei paska miþ sipōnjam meináim matjáu?

15 Jah sa izwis táikneiþ kēlikn mikilata, gastrawiþ, manwjata; jah jáinar manwjáiþ unsis.

16 Jah usiddjēdun þái sipōnjōs —

41 — sái, galēwjada sunus mans in handuns frawaúrhtáizē.

42 Urreisiþ, gaggam! Sái, sa lēwjands mik atnēƕida.

43 Jah sunsáiw naúhþanuh at imma rōdjandin qam Iudas, sums þizē twalibē, jah miþ imma managei miþ haírum jah triwam fram þáim aúhumistam gudjam jah bōkarjam jah sinistam.

44 Atuh-þan-gaf sa lēwjands im bandwōn qiþands: þammei kukjáu, sa ist: greipiþ þana jah tiuhiþ arniba.

45 Jah qimands sunsáiw, atgaggands du imma qaþ: rabbei, rabbei! jah kukida imma.

46 Iþ eis uslagidēdun handuns ana ina jah undgripun ina.

47 Iþ áins sums þizē atstandandanē imma uslūkands haíru slōh skalk aúhumistins gudjins jah afslōh imma áusō þata taíhswō.

48 Jah andhafjands Iēsus qaþ du im: swē du wáidēdjin urrunnuþ miþ haírum jah triwam greipan mik.

49 Daga ƕammēh was at izwis in alh láisjands jah ni gripuþ mik: ak ei usfullnōdēdeina bōkōs.

50 Jah aflētandans ina gaþlaúhun allái.

51 Jah áins sums juggaláuþs láistida afar imma biwáibiþs leina ana naqadana; jah gripun is þái juggaláudeis.

52 Iþ is bileiþands þamma leina naqaþs gaþláuh faúra im.

53 Jah gataúhun Iēsu du aúhumistin gudjin; jah garunnun miþ imma aúhumistans gudjans allái jah þái sinistans jah bōkarjōs.

54 Jah Paítrus faírraþrō láistida afar imma, untē qam in garda þis aúhumistins gudjins; jah was sitands miþ andbahtam jah warmjands sik at liuhada.

55 Iþ þái aúhumistans gudjans jah alla sō gafaúrds sōkidēdun ana Iēsu weitwōdiþa du afdáuþjan ina; jah ni bigētun.

56 Managái áuk galiug weitwōdidēdun ana ina, jah samaleikōs þōs weitwōdiþōs ni wēsun.

57 Jah sumái usstandandans galiug weitwōdidēdun ana ina qiþandans:

58 þatei weis gaháusidēdum qiþandan ina þatei ik gataíra alh þō handuwaúrhtōn, jah bi þrins dagans anþara unhanduwaúrhta gatimrja.

59 Jah ni swa samaleika was weitwōdiþa izē.

60 Jah usstandands sa aúhumista gudja in midjáim frah Iēsu qiþands: niu andhafjis waíht, ƕa þái ana þuk weitwōdjand?

61 Iþ is þaháida, jah waíht ni andhōf. Aftra sa aúhumista gudja frah ina jah qaþ du imma: þu is Xristus sa sunus þis þiuþeigins?

62 Iþ is qaþuh: ik im; jah gasaíƕiþ þana sunu mans af taíhswōn sitandan mahtáis, jah qimandan miþ milhmam himinis.

63 Iþ sa aúhumista gudja disskreitands wastjōs seinōs qaþ: ƕa þanamáis þaúrbum weis weitwōdē?

64 Háusidēduþ þō wajamērein is: ƕa izwis þugkeiþ? Þaruh eis allái gadōmidēdun ina skulan wisan dáuþáu.

65 Jah dugunnun sumái speiwan ana wlit is jah huljan andwaírþi is jah káupatjan ina, jah qēþun du imma: praúfētei! jah andbahtōs gabaúrjaba lōfam slōhun ina.

66 Jah wisandin Paítráu in rōhsnái dalaþa jah atiddja áina þiujō þis aúhumistins gudjins,

67 jah gasaíƕandei Paítru warmjandan sik, insaíƕandei du imma qaþ: jah þu miþ Iēsua þamma Nazōreináu wast.

68 Iþ is afaíáik qiþands: ni wáit, ni kann ƕa þu qiþis. Jah galáiþ faúr gard, jah hana wōpida.

69 Jah þiwi gasaíƕandei ina aftra dugann qiþan þáim faúrastandandam, þatei sa þizei ist.

70 Iþ is aftra láugnida. Jah afar leitil aftra þái atstandandans qēþun du Paítráu: bi sunjái, þizei is; jah áuk razda þeina galeika ist.

71 Iþ is dugann afáikan jah swaran þatei ni kann þana mannan þanei qiþiþ.

72 Jah anþaramma sinþa hana wōpida. Jah gamunda Paítrus þata waúrd, swē qaþ imma Iēsus, þatei faúrþizē hana hrukjái twáim sinþam, inwidis mik þrim sinþam. Jah dugann greitan.

1 Jah sunsáiw in maúrgin garūni táujandans þái aúhumistans gudjans miþ þáim sinistam jah bōkarjam, jah alla sō gafaúrds gabindandans Iēsu brāhtēdun ina at Peilātáu.

2 Jah frah ina Peilātus: þu is þiudans Iudaiē? Iþ is andhafjands qaþ du imma: þu qiþis.

3 Jah wrōhidēdun ina þái aúhumistans gudjans filu.

4 Iþ Peilātus aftra frah ina qiþands: niu andhafjis ni waíht? sái, ƕan filu ana þuk weitwōdjand.

5 Iþ Iēsus þanamáis ni andhōf, swaswē sildaleikida Peilātus.

6 Iþ and dulþ ƕarjōh fralaílōt im áinana bandjan þanei bēdun.

7 Wasuh þan sa háitana Barabbas miþ þáim miþ imma drōbjandam gabundans, þáiei in aúhjōdáu maúrþr gatawidēdun.

8 Jah usgaggandei alla managei dugunnun bidjan, swaswē sinteinō tawida im.

9 Iþ Peilātus andhōf im qiþands: wileidu fraleitan izwis þana þiudan Iudaiē?

10 Wissa áuk þatei in neiþis atgēbun ina þái aúhumistans gudjans.

11 Iþ þái aúhumistans gudjans inwagidēdun þō managein ei máis Barabban fralaílōti im.

12 Iþ Peilātus aftra andhafjands qaþ du im: ƕa nu wileiþ ei táujáu þammei qiþiþ þiudan Iudaiē?

13 Iþ eis aftra hrōpidēdun: ushramei ina.

14 Iþ Peilātus qaþ du im: ƕa allis ubilis gatawida? Iþ eis máis hrōpidēdun: ushramei ina.

15 Iþ Peilātus wiljands þizái managein fullafahjan, fralaílōt im þana Barabban, iþ Iēsu atgaf usbliggwands, ei ushramiþs wēsi.

16 Iþ gadraúhteis gataúhun ina innana gardis, þatei ist praítōriaún, jah gahaíháitun alla hansa,

17 jah gawasidēdun ina paúrpurái, jah atlagidēdun ana ina þaúrneina wipja uswindandans,

18 jah dugunnun gōljan ina: háils, þiudan Iudaiē!

19 Jah slōhun is háubiþ ráusa, jah bispiwun ina, jah lagjandans kniwa inwitun ina.

20 Jah biþē bilaíláikun ina andwasidēdun ina þizái paúrpurái, jah gawasidēdun ina wastjōm swēsáim, jah ustaúhun ina ei ushramidēdeina ina.

21 Jah undgripun sumana mannē, Seimōna Kyreinaiu, qimandan af akra, attan Alaíksandráus jah Rufáus, ei nēmi galgan is.

22 Jah attaúhun ina ana Gaúlgaúþa staþ þatei ist gaskeiriþ ƕaírneins staþs.

23 Jah gēbun imma drigkan wein miþ Smyrna; iþ is ni nam.

24 Jah ushramjandans ina disdáiljand wastjōs is waírpandans hláuta ana þōs, ƕarjizuh ƕa nēmi.

25 Wasuh þan ƕeila þridjō, jah ushramidēdun ina.

26 Jah was ufarmēli faírinōs is ufarmēliþ: sa þiudans Iudaiē.

27 Jah miþ imma ushramidēdun twans wáidēdjans, áinana af taíhswōn jah áinana af hleidumein is.

28 Jah usfullnōda þata gamēlidō þata qiþanō: jah miþ unsibjáim rahniþs was.

29 Jah þái faúrgaggandans wajamēridēdun ina, wiþōndans háubida seina jah qiþandans: ō sa gataírands þō alh jah bi þrins dagans gatimrjands þō,

30 nasei þuk silban jah atsteig af þamma galgin!

31 Samaleikō jah þái aúhumistans gudjans biláikandans ina miþ 263sis missō miþ þáim bōkarjam qēþun: anþarans ganasida, iþ sik silban ni mag ganasjan.

32 Sa Xristus, sa þiudans Israēlis, atsteigadáu nu af þamma galgin, ei gasaíƕáima jah galáubjáima. Jah þái miþ ushramidans imma idweitidēdun imma.

33 Jah biþē warþ ƕeila saíhstō, riqis warþ ana allái aírþái und ƕeila niundōn.

34 Jah niundōn ƕeilái wōpida Iēsus stibnái mikilái qiþands: aílōē aílōē, lima sibakþanei, þatei ist gaskeiriþ: guþ meins, guþ meins, duƕē mis biláist?

35 Jah sumái þizē atstandandanē gaháusjandans qēþun: sái, Hēlian wōpeiþ.

36 Þragjands þan áins jah gafulljands swamm akeitis, galagjands ana ráus, dragkida ina qiþands: lēt, ei saíƕam qimáiu Hēlias athafjan ina.

37 Iþ Iēsus aftra lētands stibna mikila uzōn.

38 Jah faúrahāh alhs disskritnōda in twa iupaþrō und dalaþ.

39 Gasaíƕands þan sa hundafaþs sa atstandands in andwaírþja is þatei swa hrōpjands uzōn, qaþ: bi sunjái, sa manna sa sunus was guþs.

40 Wēsunuþ-þan qinōns faírraþrō saíƕandeins, in þáimei was Marja sō Magdalēnē jah Marja Iakōbis þis minnizins jah Iōsēzis áiþei jah Salōmē.

41 Jah þan was in Galeilaia, jah láistidēdun ina jah andbahtidēdun imma, jah anþarōs managōs þōzei miþ iddjēdun imma in Iaírusalēm.

42 Jah juþan at andanahtja waúrþanamma, untē was paraskaíwē, saei ist fruma sabbatō,

43 qimands Iōsēf af Areimaþaias, gaguds ragineis, saei was silba beidands þiudangardjōs guþs, anananþjands galáiþ inn du Peilātáu jah baþ þis leikis Iēsuis.

44 Iþ Peilātus sildaleikida ei is juþan gaswalt; jah atháitands þana hundafaþ frah ina juþan gadáuþnōdēdi.

45 Jah finþands at þamma hundafada fragaf þata leik Iōsēfa.

46 Jah usbugjands lein jah usnimands ita biwand þamma leina 264jah galagida ita in hláiwa þatei was gadraban us stáina, jah atwalwida stáin du daúra þis hláiwis.

47 Iþ Marja sō Magdalēnē jah Marja Iōsēzis sēƕun ƕar galagiþs wēsi.

1 Jah inwisandins sabbatē dagis Marja sō Magdalēnē jah Marja sō Iakōbis jah Salōmē usbaúhtēdun arōmata, ei atgaggandeins gasalbōdēdeina ina.

2 Jah filu áir þis dagis afarsabbatē atiddjēdun du þamma hláiwa at urrinnandin sunnin.

3 Jah qēþun du sis missō: ƕas afwalwjái unsis þana stáin af daúrōm þis hláiwis?

4 Jah insaíƕandeins gáumidēdun þammei afwalwiþs ist sa stáins; was áuk mikils abraba.

5 Jah atgaggandeins in þata hláiw gasēƕun juggaláuþ sitandan in taíhswái biwáibidana wastjái ƕeitái; jah usgeisnōdēdun.

6 Þaruh qaþ du im: ni faúrhteiþ izwis, Iēsu sōkeiþ Nazōraiu þana ushramidan; nist hēr, urráis, sái þana staþ þarei galagidēdun ina.

7 Akei gaggiþ qiþiduh du sipōnjam is jah du Paítráu þatei faúrbigaggiþ izwis in Galeilaian; þaruh ina gasaíƕiþ, swaswē qaþ izwis.

8 Jah usgaggandeins af þamma hláiwa gaþlaúhun; diz-uh-þan-sat ijōs reirō jah usfilmei, jah ni qēþun mannhun waíht; ōhtēdun sis áuk.

9 Usstandands þan in maúrgin frumin sabbatō atáugida frumist Marjin þizái Magdalēnē, af þizáiei uswarp sibun unhulþōns.

10 Sōh gaggandei gatáih þáim miþ imma wisandam, qáinōndam jah grētandam.

11 Jah eis háusjandans þatei libáiþ jah gasaíƕans warþ fram izái, ni galáubidēdun.

12 Afaruh þan þata — —