DU TEIMAÚÞAÍÁU ANÞARA

1 Pawlus, apaústaúlus Xristáus Iēsuis þaírh wiljan guþs bi gaháitam libáináis sei ist in Xristáu Iēsu,

2 Teimaúþaíáu, liubin barna, ansts, armaiō, gawaírþi fram guþȧ attin jah Xristáu Iēsu fráujin unsaramma.

3 Awiliudō guϸa meinamma, ϸammei skalkinō fram fadreinam in hráinjái gahugdái, ƕáiwa unsweibandō haba bi þuk gaminϸi in bidōm meináim naht jah daga,

4 gaírnjands þuk gasaíƕan, gamunands tagrē þeináizē, ei fahēdáis usfullnáu,

5 gamáudein andnimands þizōs sei ist in pus, unliutōns galáubeináis sei bauáida faúrþis in awōn þeinái Lauidjái jah áiþein þeinái Aíwneikái, gaþ-þan-traua þatei jah in þus.

6 In þizōzei waíhtáis gamáudja þuk anaqiujan anst guþs, sei ist in þus þaírh analagein handiwē meináizō.

7 Untē ni gaf unsis guþ ahman faúrhtẹins, ak mahtáis jah friaþwōs jah inaheins.

8 Ni nunu skamái þuk weitwōdiþōs fráujins unsaris Iēsuis nih meina, bandjins is, ak miþ arbáidei aíwaggēljōn bi mahtái guþs,

9 þis nasjandins uns jah laþōndins laþōnái weihái, ni bi waúrstwam unsaráim, ak bi seinái leikáinái jah anstái sei gibana ist unsis in Xristáu Iēsu faúr mēla áiweina,

10 iþ gaswikunþida nu þaírh gabaírhtein nasjandis unsaris Iēsuis Xristáus, gataírandins raíhtis dáupu, iþ galiuhtjandins libáin jah unriurein þaírh aíwaggēljōn,

11 in þōei gasatiþs im ik mērjands jah apaústaúlus jah láisareis þiudō,

12 in þizōzei faírinōs jah þata winna; akei nih skama mik, untē wáit ƕamma galáubida, jah gatraua þammei mahteigs ist þata anafilh mein fastan in jáinana dag.

13 Frisaht habands háiláizē waúrdē, þōei at mis háusidēs in galáubeinái jah friaþwái in Xristáu Iēsu,

14 þata gōdō anafilh fastái þaírh ahman weihana saei bauiþ in uns.

15 Wáist þatei afwandidēdun sik af mis allái þáiei sind in Asiái, þizēei ist Fygaílus jah Aírmōgaínēs.

16 Gibái armaiōn fráuja Aúneiseifaúráus garda, untē ufta mik anaþrafstida jah náudibandjō meináizō ni skamáida sik;

17 ak qimands in Rūmái usdáudō sōkida mik jah bigat.

18 Gibái fráuja imma bigitan armahaírtein at fráujin in jáinamma daga; jah ƕan filu máis in Aífaísōn andbahtida mis, waíla þu kant.

1 Þu nu, barn mein walisō, inswinþei þuk in anstái þizái in Xristáu Iesu,

2 jah þōei háusidēs at mis þaírh managa weitwōdja, waúrda guþs, þō anafilh triggwáim mannam, þáiei waírþái sijáina jah anþarans láisjan.

3 Þu nu arbáidei swē gōds gadraúhts Xristáus Iēsuis.

4 Ni áinshun draúhtinōnds fráujin dugawindiþ sik gawaúrkjam þizōs aldáis, ei galeikái þammei draúhtinōþ.

5 Jah þan jabái háifsteiþ ƕas, ni weipada, niba witōdeigō brikiþ.

6 Arbáidjands aírþōs waúrstwja skal frumist akranē andniman.

7 Fraþei þatei qiþa; gibiþ áuk þus fráuja fraþi us alláim.

8 Gamuneis Xristu Iēsu urrisanana us dáuþáim us fráiwa Daweidis bi aíwaggēljōn meinái,

9 in þizáiei arbáidja und bandjōs swē ubiltōjis; akei waúrd guþs nist gabundan.

10 Inuh þis all gaþula bi þans gawalidans, ei jah þái ganist gatilōna, sei ist in Xristáu Iēsu miþ wulþáu áiweinamma.

11 Triggw þata waúrd: jabái miþ gadáuþnōdēdum, jah miþ libam;

12 jabái gaþulam, jah miþ þiudanōm; jabái afáikam, jah is afáikiþ uns;

13 jabái ni galáubjam, jáins triggws wisiþ; afáikan sik silban ni mag.

14 Þizē gamáudei, weitwōdjands in andwaírþja fráujins. Waúrdam weihan du ni waíhtái dáug, niba uswalteinái þáim háusjōndam.

15 Usdáudei þuk silban gakusanana usgiban guþa waúrstwjan unáiwiskana, raíhtaba ráidjandan waúrd sunjōs.

16 Iþ þō dwalōna usweihōna láusawaúrdja biwandei; untē filu gaggand du afgudein,

17 jah waúrd izē swē gunds aliþ; þizēei ist Ymaínaius jah Filētus,

18 þáiei bi sunja uswissái usmētun, qiþandans usstass ju waúrþana, jah galáubein sumáizē uswaltidēdun.

19 Aþþan tulgus grunduwaddjus guþs standiþ, habands sigljō þata: kunþa fráuja þans þáiei sind is, jah: afstandái af unsēlein ƕazuh saei namnjái namō fráujins.

20 Aþþan in mikilamma garda ni sind þatáinei kasa gulþeina jah silubreina, ak jah triweina jah digana, jah suma du swērein, sumuþ-þan du unswērein.

21 Aþþan jabái ƕas gahráinjái sik þizē, waírþiþ kas du swēriþái gaweiháiþ, brūk fráujin, du allamma waúrstwē gōdáizē gamanwiþ.

22 Aþþan juggans lustuns þliuh; iþ láistei garaíhtein, galáubein, friaþwa, gawaírþi miþ þáim bidái anaháitandam fráujan us hráinjamma haírtin.

23 Iþ þōs dwalōns jah untalōns sōknins biwandei, witands þatei gabaírand sakjōns.

24 Iþ skalks fráujins ni skal sakan, ak qaírrus wisan wiþra allans, láiseigs, usþulands,

25 in qaírrein talzjands þans andstandandans, niu ƕan gibái im guþ idreiga du ufkunþja sunjōs,

26 jah usskawjáindáu us unhulþins wruggōn, fram þammei gafāhanái habanda afar is wiljin.

1 Aþþan þata kunneis ei in spēdistáim dagam atgaggand jēra sleidja,

2 jah waírþand mannans sik frijōndans, faíhugaírnái, biháitjans, háuhhaírtái, wajamērjandans, fadreinam ungaƕaírbái, láuna-wargōs, unaírknái,

3 unhunslagái, unmildjái, faírinōndans, ungahabandans sik, unmanariggwái, unsēljái,

4 fralēwjandans, untilamalskái, ufbáulidái, frijōndans wiljan seinana máis þáu guþ,

5 habandans hiwi gagudeins, iþ maht izōs inwidandans; jah þans afwandei.

6 Untē us þáim sind þáiei sliupand in gardins jah frahunþana tiuhand qineina afhlaþana frawaúrhtim, þōei tiuhanda du lustum missaleikáim,

7 sinteinō láisjandōna sik jah ni áiw ƕanhun in ufkunþja sunjōs qiman mahteiga.

8 Aþþan þamma háidáu ei Jannēs jah Mambrēs andstōþun Mōsēza, swa jah þái andstandand sunjái, mannans frawaúrþanái ahin, uskusanái bi galáubein;

9 akei ni þeihand du filusnái, untē unwiti izē swikunþ waírþiþ alláim, swaswē jah jáináizē was.

10 Iþ þu galáista is láiseinái meinái, usmēta, muna, sidáu, galáubeinái, usbeisnái, friaþwái, þuláinái,

11 wrakjōm, wunnim, ƕileika mis waúrþun in Antiaúkiái, in Eikaúniōn, in Lystrys, ƕileikōs wrakōs usþuláida, jah us alláim mik galáusida fráuja.

12 Jah þan allái þáiei wileina gagudaba liban in Xristáu Iēsu, wrakōs winnand.

13 Iþ ubilái mannans jah liutái þeihand du waírsizin, aírzjái jah aírzjandans.

14 Iþ þu framwaírþis wisáis in þáimei galáisidēs þuk jah gatrauáida sind þus, witands at ƕamma ganamt,

15 jah þatei us barniskja weihōs bōkōs kunþēs, þōs mahteigōns þuk usfratwjan du ganistái þaírh galáubein þō in Xristáu Iēsu.

16 All bōkō gudiskáizōs ahmateináis jah þaúrftōs du láiseinái, du gasahtái, du garaíhteinái, du talzeinái in garaíhtein,

17 ei ustaúhans sijái manna guþs, du allamma waúrstwē gōdáizē gamanwiþs.

1 Weitwōdja in andwaírþja guþs jah fráujins Xristáus Iēsuis. Saei skal stōjan qiwans jah dáuþans bi qum is jah þiudinassu is:

2 mērei waúrd, instand ūhteigō, unūhteigō, gasak, gaþláih, gaƕōtei in allái usbeisnái jah láiseinái.

3 Waírþiþ mēl þan háila láisein ni usþuland, ak du seináim lustum gadragand sis láisarjans, suþjōndans háusein;

4 aþþan af sunjái háusein afwandjand, iþ du spillam gawandjand sik.

5 Iþ þu andaþāhts sijáis in alláim, arbáidei, waúrstw waúrkei aíwaggēlistins, andbahti þein usfullei.

6 Aþþan ik ju hunsljada jah mēl meináizōs diswissáis atist.

7 Háifst þō gōdōn háifstida, run ustáuh, galáubein gafastáida;

8 þaþrōh galagiþs ist mis wáips garaíhteins, þanei usgibiþ mis fráuja in jáinamma daga, sa garaíhta staua; aþþan ni þatáinei mis, ak jah alláim þáiei frijōnd qum is.

9 Sniumei qiman at mis spráutō;

10 untē Dēmas mis biláiþ, frijōnds þō nu ald, jah galáiþ du Þaíssalaúneikái, Xrēskus du Galatiái, Teitus du Dalmatiái.

11 Lukas ist miþ mis áins. Marku andnimands brigg miþ þus silbin, untē ist mis brūks du andbahtja.

12 Aþþan Tykeiku insandida in Aífaísōn.

13 Hakul þanel biláiþ in Trauadái at Karpáu qimands atbaír, jah bōkōs, þishun maímbranans.

14 Alaíksandrus áizasmiþa managa mis unþiuþa ustáiknida; usgildiþ imma fráuja bi waúrstwam is;

15 þammei jah þu witái, filu áuk andstōþ unsaráim waúrdam.

16 In frumistōn meinái sunjōnái ni manna mis miþ was, ak allái mis biliþun, ni rahnjáidáu im. — —